Kloi ka Sorkar Jylla ban iatreilang bad ki nongialam niam ban kyntiew ia ki samla: Dr Ampareen

Syllad | The Rising MeghalayaDecember 12, 2023

Ka Myntri ka Tnat ka koit ka khiah ka sorkar jylla ka Dr. Ampareen Lyngdoh haba plie ia ka surok (Approach road) na St. Paul’s Parish sha madan phutbol haka 10 tarik Nohprah, ka la ong ba ka Sorkar jylla ka khmih shakhmat ban iasnohkti lang bad ki nongialam niam kiba kloi ban trei bad ban kyntiew ia ka bha ka miat jong ki khun samla.

Ia kane ka Myntri ka la pynpaw ha ka sngi plie pyrda ia ka Albera Home Youth Development Centre, Laimer, Upper Shillong. Ka la ong ruh ba watla ka sorkar kam lah ban leh bun kiei kiei, hynrei ki nongialam niam ki wan shakhmat ban shim ia ka kamram kaba kongsan bad ki sienjam ban aijingnang jingtip bad kyntiew ia ki khun samla.

Nalor kata ka pynpaw ba na ka liang ka sorkar kan ai ruh ka jingiatreilang bad bun kiwei pat ki shnat aijinghikai kiba lah ban shim ia kane kajuh ka kamram ban kyntiew ia ki samla ha ka imlang sahlang baroh kawei.

U Bah Ronnie V. Lyngdoh, MLA/MDC ka thain ha ka jingkren, u la ong ba 75% jong ki nongshong shnong ha ka ri India ki dei ki samla kiba hapoh ka 35 snem ka rta. U la bynrap ba ki samla ki long ka lawei jong ka jaidbynriew bad ba ki dei ban wad ia kaei kaei kaba long janai ban jop ia ka thong jong ka jingim.

Kiwei pat kiba la ai jingkren ha kane ka sngi ki kynthup ia u Fr Tobias K Kynta, Parish Priest ka St. Paul’s Parish Upper Shillong.

Ia ka prokram la pyniaid  da u Bah John Jarain,Vice Principal ka St. Gabriel Hr. Sec. School, Upper Shillong. Kiwei kiba lah don lang ha kane ka sngi kynthup ia u Bah Daniel Thangkhiew, OSD jong u Myntri Rangbah, Fr. Sylvanus Nongkynrih bad Fr. Genesimus Nongneng ki phadar synrop, Fr. VT Jose, Novice Master, Sunnyside , Fr. Augustine Warbah, Rector St. Paul’s Seminary, Fr. Devasia na Siloam, ha ryngkat ka jingiadon lang ki riewniam kynthei,  ki dkhot ka Parish Pastoral Council, bad ki dkhot ka Seng Longkpa, Seng Kynthei & Seng Samla bad kiwei pat ki samla ba la kot palat 500 tam eiei.