Kitbok kitrwiang ka JSU ia u general secretary barim Treiborlang R Suchen uba la rung sha ka jylli jong ka sain pyrthei

Syllad | The Rising MeghalayaJanuary 27, 2025

Ka Jaintia students’ Union (JSU) kala ai ka jingkitbok kitrwiang ia u general secretary barim u Treiborlang R Suchen uba la rung sha ka jylli jong ka sain pyrthei bad ula pynbna ruh ba un iakhun iaka MDC Election na War West MDC Constituency sha ka Jaintia Hills Autonomous District Council (JHADC) ka ban long haka 21 tarik Rymphang.

Kum ka dak ban pynpaw iaka jingpyrto ia u synniang u bynhei ba ula noh sha ka JSU, haka 25 tarik Rymphang kala pynburom ia une u nongialam barim bad ai ka jingkyrkhu kyrdoh bad ka jingpyneh bok nusip ba un jop ha kane ka MDC election ban wan.

Ha kane ka jingialang pynkup ia u Treiborlang la iadonlang u President JSU Central Body Ma Jersom Shylla, u Acting Secretary Neilkee Mukhim, u Publicity Secretary u Dapmain Suchiang nalor kiwei kiwei ki dkhot nongkitkam ka JSU

U Ma Jersom haba ai jingkren u pynkynmaw ba ka seng JSU ki lamih shibun ki nongmihkhmat ha ka kam sain hima sima naduh mynshuwa. U la ai mynsiem ia kiwei ki dkhot ba kin nangtrei shitom haka bor ba ki don bad ka seng namar shisien ka sngi kin jam sha uwei pat u mawjam haka jingim la haka kam sain hima sima ne kiwei kiwei ki kam ban shakri iaka jaidbynriew.

U Ma Treborlang R Suchen, u la ai ruh ia ki kyntien sneng u la kyntu ruh ia ka seng ban trei shitom na ka bynta ka jait bynriew khlem da thew da woh, hyrnei ban ai ka jingshakri kaba salonsar ban myntoi ka imlang ka sahlang bad ka jaidbynriew.