Kitbok ka MFA ia ka referee ka Jylla ka ban leit sha ka FIFA Women’s World Cup

Syllad | The Rising MeghalayaSeptember 19, 2024

Ka Meghalaya Football Association (MFA) ka ai ka jingkitbok kitrwiang bad pynpaw ia ka mynsiem sngew sarong hadien ba kawei na ki samla referee football kynthei na kane ka jylla ka Riiohlang Dhar ka la shah jied ban iarap pyniaid ia ka lympung ialehkai phutbol jong ka Under -17 FIFA Women’s World Cup.

Kum ban shu pynkynmaw ba ka Riiohlang ka dei kaba trei hapoh ka 1st MLP Battalion hangne ha nongbah Shillong bad ka long artad tang ma ka na ka ri India ba kan ioh ia kane ka kabu ksiar ban don bynta  ha kaban pyniaid ia kane ka lympung kaba heh.

Kumta na ka liang ka MFA ka la shim ia ka sienjam leh burom ia ka da kaba pynkup da ka jain thohrew stem ha ryngkat ka song jingiarap pisa kaba T. 25 hajar ha ka jingialang kaba la long ha ka 18 tarik Nailur ha ka ophis treikam jong ka ha JN Stadium Polo ha ka jingiadon lang u President bad Secrertary ka MFA u bah Hamletson Dohling bad u bah Sunesh Syiem nalor ki dkhot nongkitkam.

U Bah Hamletson haba kren ha ka jingialang u la pynpaw ka jingkmen kaba khraw na ka bynta ka MFA, ia ki paidbah  ka jylla bad ia ka ri hi baroh kawei ha kaba kawei ka riew kynthei ka Jylla kan ioh ban mihkhmat ia ka ri sha kane ka lympung kaba heh.

Kumjuh na ka liang u Bah Sunesh Syiem ruh u la shim ba kane ka dei shisha kawei na ki kam ba radbah bad pynpaw ba kum ka Synjuk kam don ei ei ban ai hynrei tang ka ka kitbok kitrwiang ia ka Riiohlang ba kan lah ban pyndep ia la ka jong ka kamram.