Ki Social Media bad IT Policy ki daw ka jingkiew ki kam thombor ia ki kynthei, ong u bah Paul

Syllad | The Rising MeghalayaMay 15, 2024

U Myntri ka Tnat Social Welfare u Bah Paul Lyngdoh u la ong ba ka jingkiew jong ki kam thombor pyrshah ia ki kynthei ka dei namar ka jingjur ha ki rukom pyndonkam bakla ia ki rynsan social media bad namar ka jingbym don ia ka ka Information Technology (IT) Policy kaba biang hapoh ka Ri.

Haba kren sha ki lad pathai khubor ha ka 14 tarikJymmang, u Bah Paul u la ong, “Kane ka jinglong jingman ka dei kaba wanrah ia ka jingkylla ha ka jinglong ha ki briew bad ka jingphaikhmat sha kiwei pat ki para briew kaba la nangkyntiew shuh shuh ia ki rukom pyndonkam bakla ia ki rynsan social media.”

Nalor kata u la ong ruh, “Phin iohi ba haba ma phi bad nga ngi dei ban iakren, ngi ju pyndonkam da ki ktien kiba don akor, hynrei wei ba nga kren ia phi lyngba ka social media, nga pyndonkam ia ki kyntiew ki bym sngewtynnad.”

U Myntri u la ong ruh ba ki don shibun ki jingbym biang ha ka IT policy ba la pyntreikam hapoh ka Ri, bad dei na kane ka daw ba ki briew ki iohlad da kaba suk ban ioh rung katba mon sha kino kino ki site kiba pynshlur ban ym burom wat ia ki kynthei, ban kren bein bad kren khlam akor ia ki bad kiba lam ruh sha u pud wat ban thombor ia ki.

“Ka long da shisha kaba pynkhuslai shibun hynrei tang ka ain hi marwei kan ym lah ban tehlakam ia kane.Ka dei ban don da ka jingialap bad jingpynshai ha ki kyrdan bapher bapher, bad kane ka long kaba kongsan bad ia kaba dei ban sdang na ki shnong ki thaw bad ka jingmih shakhmat da ki nongialam niam kiba khmih ia la ki jong ki riew ngeit,” ong shuh shuh u Myntri.