Ki sengbhalang kim donbor ban khynra Trading License: Bah Teibor Pathaw

Syllad | The Rising MeghalayaJune 20, 2019

SHILLONG: U Executive Member badei khmih iaka tnad enforcement ka Khasi Hills Autonomous District Council (KHADC) u Bah Teibor Pathaw u la kren shai ba ki sengbhalang kim don bor ban khynra ia ki dukan haba iadei bad ki kot ki sla ba dei ban ioh na ka council, kum ka trading lane labour licence namar kane ka dei ka kamram ka council.

“Ngi la iohi ia kane ka jingleit khynra kine ki sengbhalang ia ki dukan haba iadei bad ka jingdon ne em ki kot ki sla ba biang ba ioh na district council, hynrei kim don bor ban leh ia kane hynrei dei tang ka tnad enforcement wing jong ka district council kaba lah ban leh ia kane ka kam lada I donkam,” la ong u Bah Pathaw.

U la ong ruh ba lada kine ki snengbhalang ki lap ba ka don ka jingkhaii beain bad ba ki don ki briew ba pyniaid ia ki dukan lane ki kam jong ki khlem pat da ioh ia ka trading licence na ka district council ki dei ban pyntip shuwa sha ka tnad ba dei khmih ia kane ka mat bad kumta naka liang ka tnad kan sa shimkhia ban phah ia ki enforcement ban khmih bniah ia ki kot ki sla jong kino kino ki dukan.

Ula iathuh ba ki don ki sengbhalang kiba ju pyntip sha ka district council haba don ki briew kiba trei khlem da ioh iaka labour licence naka district council bad kumta naka tnad la shimkhia bad la phah leit sha kito ki jaka ban leit phah peit bad ki don ruh ki sengbhalang ki bym pyntip iaka council.

La kyntu ruh ia ki sengbhalang ba lada ki lap ba don ba leh beain ne iaid lait iaka district council haba iadei bad ka trading lane ka labour licence kidei ban pyntip shuwa sha ki tnad badei khmih ia kane ka kam ha KHADC.

U Bah Pathaw u la pynpaw ruh ia ka jing sngewkhia haba iadei bad ka rukom long rukom man ka tnad enforcement namar kumba long mynta ki dang duna palat ki kki nongtrei haka tnad enforcement ka KHADC.

“Ka kamram ka tnad ka long ban phah ia ki enforcement ban leit ban jurip haba iadei bad ki kot ki sla jong ki dukan lada ki la ioh ne em ia ka trading licence naka district council namar ban seng kam neh buh dukan khlem ka jingbit ka council ka long beain bad kumta ka council khnang ban dang lah ban trei kham bha la donkam ban pynbha shuh shuh iaka tnad,” u la ong.

U la pynpaw ruh ba kumba long mynta ka KHADC ka dong tang kumba 76 ngut ki pulit enforcement wing ha district council bad kumta la don ka jingthmu ban kham pynbha iaka rukom treikam ka tnad ha council.

U la iathuh ruh baka la ju don ruh ka jingiakren bad ka sorkar jylla ban kham pynkhlain iaka tnad enforcement wing lyngba ka grant-in-aid sha kaka district council, hynrei naduh u snem 2014 ka council ka khlem ioh pisa shuh naka sorkar jylla haba iadei ban pynkhlain ia kane ka tnad.

“Haba iadei bad kane ngi la dep iakren bad u EM badei khmih iaka tnad Trade u Bah Paul Lyngdoh bad u Deputy CEM u Bah Pyniaid Sing Syiem ba ngin pynkhlain ia kane ka tnad enforcement wing khnang ba ngin lah ban pyntreikam naka bynta ban peit lane khynra haba iadei bad ki kam beain ba iadei bad ka trade lane labour licence,” u la ong.