Ki dukan die madan ki dei ban iohbor na ka shnong, pynphai biang ka Dawki Land Port iaki tiar bad pisa ki nongdie madan

Syllad | The Rising MeghalayaSeptember 22, 2024

Hadien ka jingtuklar ka dorbar shnong Bakur, Khasi Students’ Union, War Jaintia Cricle bad ka Voice of the People Party, Amlarem ki bor pyniaid ka Dawki Land Port bad ki shipai BSF kila pynphai noh iaki tiar ki tar bad ka pisa jong ki nongdie madan kiba la shah kyndang dang shen bad la rai ruh ban ailad biang iaki nongdie madan ban bteng biang ban die jingdie ha ki jaka bala ai jingbit.

Kane kala wan hadien ka jingialang kaba long haka 21 tarik Nailur hadpeng ka KSU War Jaiñtia Circle hapoh ka jingialam u general secretary, samla Platini Mukhim, ryngkat ki dkhot, bad ki nongialam shnong kiba kynthup ia u secretary shnong Bakur Bah Luckystar Manar haka jingiadonlang ki nongialam ka VPP Amlarem Constituency u Jamshaphrang Pohtam bad Rejiedmi Lamin, ki ba la leit mih ban ia kren ban pan jingpynshai na u Manager ka Dawki Land Port, u TC Chacko ha Dawki ha kaba iadei bad ka jingshah beh bad shah knieh tiar dukan bad ki pisa jong ki nongdie madan ha katei ka jaka.

U nongialam ka KSU ula ong ba hadien ka jingiakren sngewthuh, ka Land Port bad ki BSF ki kila rai ban pynphai biang ia ki tiar bad ka pisa jong kitei ki nongdie bad la ia rai ban ailad ia kitei ki longkmie ban die ha ki jaka ba la ai jingbit ia kaba la ia hun lang baroh.

Ha kane ka sngi ruh la rai ba kino kino ki riewshimet kiba thmu ban seng dukan ne dukan sha kali (portable) kidei ban pyntip shwa ia ka shnong khnang ban lait na ki kynrum kynram bad khamtam ban tehlakam haba iadei bad ka jingdheng kali bad ka jingkhuid ha shilynter ka surok Tamabil.

Ka seng ha ryngkat ka shnong ka kyntu jur ruh ia ki paidbah ban snohkti lang naduh ki driver truck, ki nongshong dukan ha kaban ia treilang ban lait na kino kino ki jingeh hadien habud.