Ki daw ba jyllei ki kam khaïi met ka dei na ka daw ka jingduk & ka jingkyrduh kam: Daniel

Syllad | The Rising MeghalayaJune 14, 2019

SHILLONG: U nongmihkhmat ka Delhi Police Northeast Representative (DPNER) u Bah Daniel Stone Lyngdoh u la pynpaw ka jingsngewkhia halor ka jingjur ka jingkhaïi bad dih drok kumjuh ka jingkhaii met (human trafficking) hapoh ka jylla.

U Bah Daniel u la ong ba kane ka jia na ka daw ba duna palat ki lad ïoh kam ïoh jam kaba ialam pat ïaki khynnah samla ka jylla ban ngop ha ki kam sniew bapher bapher,

U la ong ba kii kaiphod bala ïoh na ki pulit bad kumjuh na ki dorbar shnong bad ki committee bapher bapher ba ka jingkhaïi met bad ka jingkyrni ki smala ha u drok kala nang nang kiew katba nang mih ki snem.

“Ka jingkyrni ha u drok, ka jingkhaii met ki dei ki ar tylli ki jingma kiba ap ïa ka jaidbynriew, namar ba kala  pur ruh sha ki thaiñ nongkyndong ne khap sor,” la ong u Bah Daniel haba kren bad ki nongtoh khubor haka sngi Thohdieng bad bynrap ba ka imlang ka sahlang, ka sorkar kala dei ban pyrkhat bha kumno ban tem ïa kine ki kam sniew.

Ka jingkiew ki nong dih drok hapoh ka jylla khamtam hapdeng ki khynnah samla ka dei na ka daw ba ki kmie ki kpa kim don jingtip eiei halor ka jinglong jingman ki khun jong ki bad kane ka la ktah ïa bun tylli ki longïing, katba ka kam khaïi met pat ka dei namar ka jingduk kaba la pynlong ïaki bun ki samla kynthei ban shah pyngngop haka jingkhaïi met.