Khun Hynñiewtrep kam thew tang ïa u Khasi hynrei ia u bynriew shi satlak ka pyrthei: BV Rymmai

Syllad | The Rising MeghalayaJanuary 14, 2022

Khun Hynneiwtrep kam thew ne mut beit thik tang ia u Khun Khasi pynban kane ka kyntien ka dei kaba thew ia u khun bynriew shi satlak jong ka pyrthei, la ong u Bah BV Rymmai, u wei na ki nongthoh kot jong ka thain Sohra bad u ba ei artad u Secretary jong ka Hima Sohra.

Ula ong ba kane ka long katkum ka jingwad bniah bad lum thup ka jong u na ki nongthoh kot barim.

U Bah BV Rymmai haba kren bad ki nongthoh khubor haka sngi Thohdieng ula ong ba kaei kaba u la dep ba un thoh ha kawei ka kot kaba u la thoh ba la jer kyrteng ia ka “U Khun Hynniewtrep Bad Ki Khun ki 3, 4, bad 9 bynta.”

Lada pynshong nongrim ia ki khana pateng ba nangno u Khasi u wan ka jubab kaba ioh ka long ba U Khasi u wan na ki 12 snem lynti bad lada kylli pat ba balei u Khasi um don ia ka thoh ka tar, ka jubab ka long ba u Khasi u la kum nguid noh ia ka kot katba u ang kam rynieng ia ka wah.

Bad lada kylli pat ba nangno u 7 Trep u wan, ka jubab kaba ioh pat ka long ba u wan nangtei najrong bad tdot kim juh ong ba u 7 Trep u wan na  sha ki 12 snem lynti.

U bah Rymmai u la sot ruh ia ka kyntien u Myllung Soso Tham, “Shi Khrum Ka Bneng u paid Byllien shi snieh pyrthei kawei ka ktien, naduh ba mih haduh ba sep ngi dei ki khun u 7 Trep”.

Dei lyngba kine ki khana pateng kaba kren shai kdar ba ka kyntien 7 Trep kamthew ne mut tang ia u Khasi hynrei u thew ne kdup lang ia baroh u paid bynriew ba dap shi khrum ka bneng bad shi snieh jong ka pyrthei.

Hynrei  u bah Rymmai u sngew pat ban ong ba ka la don pat ka jingsngewthuh bakla ha u Khasi mynta teng teng haba ong u Phareng, baroh ia mutdur ba ka ktien phareng dei tang ba kren da u nong Bilat, hynrei u bah Rymmai u pynshai ba lada ong phareng la sot ia ka na ka kyntien Foreign bad haba u Khasi um pat nang ban kynnoh ha kito ki por u ong noh phareng, pynban mynta pat katta ka jingpyrkhat bakla ka la iai neh da kaba u Khasi u iai mutdur sah ha ka jabieng ka jong ba haba ong phareng u mut ne thew beit tang ia u nong Bilat, pynban to tip ba haba ong phareng, kane ka kyntien ka thew lut phar naduh u nong German, Italy, France bad kumta ter ter, d akumta kaba wat ia ka kyntien 7 Trep baroh ia mutdur ba dei beit tang u Khasi.