Khot hajir ka Tnat pulit ia ki nongialam ka HYC halor ka jingjia pynpra iing ha Lum Survey

Syllad | The Rising MeghalayaMay 27, 2024

Ka Tnat pulit ka la khot hajir ia ki nongialam jong ka Seng Hynniewtrep Youth Council (HYC) halor ka jingkynnoh donkti ha kaba leit kyndang bad pynpra beain ia ki iing ki sem ha Lum Survey.

Kane ka la wan long ruh hadien ba ki pulit ki la rejistar case pyrshah ia u president ka HYC u Bah Roykupar Synrem, Vice President u Donboklang Kharlyngdoh bad u Assistant General Secretary u Isaac Basaiawmoit ha ka 23 tarik mynta u bnai.

Katkum ka notice la hukum ia kine ki nongialam ka HYC ba kin leit mih hakhmat u Investigation Officer ha Sadar Police Station.

“Ha ka por ba tohkit ia ka ejahar… ba la rejistar hapoh Shillong Sadar police station, la shem ba ki don ki daw ban kylli jingkylli ia phi na ka bynta ban pynthikna ha kaba iadei bad ki jingshisha ha kane ka jingtohkit kaba dang iaid mynta. Kumta la bthah ba phin wan mih sha nga ha ka 28 tarik Jymmang ha ka por 1 baje hapoh Sadar Police Station…Ka jingkyntait ban wan mih bad pdiang ia ki kyndon jong kane ka notice, ka lah ban pynngat ia phi hapoh ka kyndon section 41 A (3) bad (4) of CrPC,” ong ka notice ba la phah da u Sub Inspector BS Sangma.