Khlad u samla ba iatyngkhuh ka Trok bad ka Maruti ha surok Shillong Bypass

Syllad | The Rising MeghalayaMay 21, 2024

Uwei u samla u la duh ei la ka jingim na ka jingjia tyngkhuh kali kaba la jia ha ka step phyrngab jong ka 20 tarik Jymmang ha ka surok bah Shillong Bypass ha ki bynta jong ka Umroi Nongrah, Ri Bhoi District.

Kane ka jingjia kaba la jia ha ka por kumba 1:50 mynstep ka la wan jia hadien ba kawei ka trok hynriew shaka kaba don ia u nombor AS-01RC-3530 ba la niah da u Teining Parein uba dei na ka shnong Mowtyrshiah, West Jaintia Hills kaba kit dewbilat ka dang wan na ka thain Lumshnong, East Jaintia Hills ban leit sha Guwahati, hynrei mar ia poi ha katei ka surok bypass ka la iatyngkhuh marpyrshah bad kawei ka Maruti Alto K 10 kaba don ia u  No. ML-05 S-5217 ba la niah da u Donald P Syiemlieh 25 snem rta uba dei na Demseiniong, Mylliem, East Khasi Hills kaba la pynlong ia u nongniah jong kane ka Maruti ba un khlad noh namar ka jingmynsaw jur.

Ha kaba iadei bad kane ka jingjia na ka liang ki bor  pulit kila register case   bad ka jingtohkit mynta kala iaid shakhmat.