Khlad ar ngut ba takhuh ka bike ha Mawlai Bypass

Syllad | The Rising MeghalayaAugust 8, 2019

SHILLONG: Arngut ki mynsiem kila duh ei haka aksident kaba la jia hynne ka step ha Mawlai Bypass.

Kine ki arngut kiba la khlad ki dei u nongniah ka bike u Badondor Shabong (21) bad ka Darihun L Nongpiur (26).

Ka khubor kaba ïohlum kane ka jingjia kala jia haka por 5 baje mynstep ha kaba ka motor bike kaba dei ka Pulsar ba don u register number ML05 J 8110 kaba niah da u Badondor Shabong ryngkat ba ki arngut kiba shong ïaka motor bike, ka Darihun L Nongpiur, bad u Lebarius Dkhar kila ïakynduh ka jingaksident ha haba poi ha jingkieng Mawlai By Pass ha kaba ka bike kala takhuh ha ki kynroh jong ka jingkieng.

La ïathuh ba kine kine ki lai ngut kila mih na Mawiong bad thmu ban leit sha Mawlai Mawtawar lyngba ka surok Mawlai Bypass. Ha kane ka jingjia aksident u nongniah u Badondor Shabong bad ka Darihun L. Nongpiur kila khlad hashen bad uwei pat uba kyrteng u Lebarius Dkhar (19) la pynkit mar sha Civil hospital Shillong da ka 108 EMRI ban ïoh ka jingsumar ba paka.

Ïa kine ki metiap la buh ha jaka buh metiap jong ka Civil hospital Shillong. Ki pulit kila pynlong jingtohkit bad pyndep iaka jingdonkam jong ka aiñ haka jingiadonlang kiba haiing jong kine kiba la khlad bad namar ba ka jingiap ka dei na ka aksident kiba haïing jong kine ki artylli ki longiing kila pan pyllait ban leh post mortem kaba la mynjur da u magistor.