Khlad 2 ngut haka aksident haki ar jaka mynsaw jur 3 ngut

Syllad | The Rising MeghalayaApril 21, 2019

SHILLONG: Arngut ki samla kila duh ei ïaka jingim kaba kordor jong ki haka jingjia aksident kaba la jia haki ar jaka ha Jylla.

Kine kiba la khlad dei kiba la tip kyrteng kum u Rison L Nonglait (22) na ka shnong Kynshi Mawria  bad uwei pat u samla pule ha sor Shillong uba na Nagaland u Honlem Konyak (20)

Baroh artylli kine ki aksident kila jia hynnin ka sngi Saitjaiñ ha Kynshi Bangla bad kawei pat ka aksident ha Riatiamkynthai hashuwa ban poi ka shnong Mawlyndep.

Ka aksident ba jia ha Kynshi Bangla  ha surokbah Nongstoin – Shillong  kala jia na ka jingiatakhuh hapdeng kali lai shaka kaba kit Um Rupa bad ka jeep kaba wan Kynshi ba thmu leit Tenbgri.

Baroh lai ngut kiba don haka kali lai shaka la pynkit mar mar sha civil Hospital Mairang bad la pynbna ba u Rison u khlad hashuwa ban poi jaka sumar.

Ka jingjia aksident ha Riatiamkynthai, ka jaka shuwa ban poi ka shnong Mawlyndep kala jia haka por 8:15 Am ha kaba ka thuk thuk kala leit tynrah ïa kawei ka kali kamai Jowai Shillong ka eco sports kaba na Raliang.

Baroh ar ngut kiba shong haka thuk kila mynsaw jur bad ka aksident kalong kaba shyrkhei bha na ka daw ka jingpynher sted ka thuk thuk. U Honlem Konyak uba niah iaka thuk thuk ula khlad ha lynti ban poi sha aspatal, katba u paralok jong u, u dang don haka jingshah sumar ha Civil Hospital Shillong.