Khang pyniap dohkha dusmon ha ki 3 tylli ki wah

Syllad | The Rising MeghalayaJanuary 3, 2022

Ka District Magistor East Khasi Hills, Kong Isawanda Laloo haka sngi Nyngkong kala pynjari da ka  kyndon ain Section 144 CrPC ban khang pyrshah iaka jingpyniap dusmon iaki dohum dohpnat haki lai tylli ki wah ba kynthup iaka wah Umngot, ka wah Umlow bad ka wah Umngi.

“Nga pynbna paidbah ba la khang bad mana tyngeh ban pyndonkam ia ki rukom khwai da kaba pynbthei bom, ki dawai bih, pynap jar/tyngsong bad kiwei kiwei ki rukom khwai doh kiba pynsaja ia ki kynja kiba im hapoh ka um,” la ong ka Kong Isawanda Laloo haka hukum kaba kala pynmih.

Ia kane ka hukum ka District Magistor kala pynmih hadien ba kala ioh jingtip ba don ki briew kiba pyndonkam ia ki rukom khwai doh da kaba pynbthei bom, ki dawai bih, pynap jar/tyngsong bad kiwei kiwei ki rukom khwai doh kiba pynsaja ia ki kynja kiba im hapoh ka wah Umngot, ka wah Umlow bad ka wah Umngi (lyngba Kenbah (Syntein), Kenmynsaw (Syntein), Domskong (syntein) Mawrapat, Mawsawa Mawkasain, Kenbah Malai, Phlangwanbroi, Kynrang, Rangweng, Pyndensohsaw, Jyllep, Khiehriat, Pomblang, Laitumsaw, Dangar, Dangar Dop, Umsawrang, Photstein, Umlynter, Lalpani bad Pynden Borsora) kiba don hapoh jong ka East Khasi Hills District.

Ka kong Laloo kala ong ba kane jingpyniap pathar ia ki dohum dohpnat kan wanrah ia ka jingduhjait ki dohkha bad kiwei pat ki kynja ba im hapoh ka um bad nalor kata kan wanrah ruh ia ka jingma ia ka koit ka khiah jong u paidbah. 

Ka District Magistor kala kyntu iaki bor ba dei peit ia ki shnong ki thaw ban ai jingtip lada lap ne tip iano iano ba pyniap pathar ia ki dohum dohpnat khnang ban pynshitom ia ki katkum ka ain.

Kane ka hukum kan treikam mardor naduh ka 03rd Kyllalyngkot 2022 tad haduh ban da pynbna pat da kumwei