Khang ka NMA ia kino kino ki jingtei hajan ki 5 tylli ki jaka sahnam ha West Jaintia Hills

Syllad | The Rising MeghalayaSeptember 27, 2023

Ka National Monuments Authority (NMA), Ministry of Culture ka Sorkar India ka la khang pyrshah ban shna ne tei ia kino kino ki jingtei hajan ki san tylli ki jingshna sahnam jong uba rim hapoh West Jaintia Hills kiba kynthup ia ka jingkieng ba la shna tang da ki maw ne (Megalithic) ha Amlarem, Ka jingkieng ba la shna da ki maw ia kaba la tip kum ka Thlumuwi ha Mupyut, ka U-Mawthoh-dur-briew ha Nartiang, ka jingkieng maw ha Syndai bad ka nan rit ha Syndai.

Na ka liang ka NMA, Ministry of Culture ka Sorkar India ka la pynmih ka jingbthah ban bud ryntih ha kaba iadei bad ka jingai NOC ne ka jingai jingbit halor ki kam tei iing tei sem bad kiwei pat ha ki jaka ba la khang pyrshah ne ki jaka ba la aijingiada kyrpang na ka bynta  ki jingtei ba kyrpang lyngba ka Centrally Protected Monuments (CPMs).

Ka jingpynmih ia kane ka hukum ka la wan long ruh hadien ka jingmih jong ki jingtei ki bym shym la ioh bor ha ki jaka ba la khang pyrshah bad ki jaka kiba hap hapoh ka Centrally Protected Monuments (CPMs) bad kaba dei ruh ka jingbud ryntih ia ki kyndon Ancient Monuments and Archaeological Sites and Remains (AMASR) Act 1958.

Ka AMASR Act ka khang pyrshah ia kino kino ki jingtei ne ki jingtreikam ha ki jaka ba la aijingiada kyrpang kiba don hajan ki jingtei sahnam ba la rim khlem ka jingioh jingmynjur na ka National Monuments Authority (NMA).

Ka AMASR Act ka khang pyrshah ia kino kino ki jingtei hapoh ka 100 meter sawdong jong ki jingtei ba la ioh jingiada kyrpang bad kaba lah ruh ban long haduh 200 meter ka jingjngai na kine ki jaka ba la khang pyrshah katkum kane ka kyndon.