Khang ka bor District East Khasi Hills ban khrong pisa beain na ki dukan, bthah ban buh CCTV

Syllad | The Rising MeghalayaDecember 16, 2023

Ka District Magistor jong ka East Khasi Hills, ka Kong RM Kurbah haka 14 tarik Nohprah, kala pynmih ia ka hukum kaba khang pyrshah ha kaba iadei bad kino kino ki jinglum pisa beaiñ na ki nongkhaii bad ki dukan hapoh ka District, bad bthah ruh ia baroh ki trai dukan ba ki dei ban pyndait da ki CCTV hapoh ki dukan jong ki.

“Da ka jingthmu ban khanglad bad tehlakam ia kine ki kam beaiñ, la khang pyrshah ia baroh ki kam lum pisa beain na ki dukan bad kiwei kiwei ki jaka treikam bad ka aiñ kan leh da kaba tyngeh lada lap ia kino kino kiba donkti ha kiba kum kine ki kam kiba long beain,” ong ka District Magistor Kong RM Kurbah ha ka hukum ba kala pynmih.

Nalor kata lyngba kane ka hukum la bthah ia ki nongshong dukan ba kin pyndait noh ia ki kor CCTV ha la ki jong ki dukan bad buh ruh ha ka jaka kaba biang bha na ka bynta ban pynthikna halor ka jingshngain bad jingiada bad ruh ban ioh ring ia kino kino ki kam beaiñ ha ki dukan jong ki.

Na ka liang ka District Magistor ka la ong ruh ba kane ka jingpynmih hukum ka la wan long ruh hadien ka jingdon jong kiba ud halor ka jinglum pisa beain na ki dukan bad kiwei kiwei pat ki jaka treikam ha ka kyrteng jong ka jingnoh synniang lane ai shithi dawa pisa kaba la ktah jur ia ki trai jong kine ki dukan bad wanrah ruh ka jingsyier ia ki riew paidbah.

Kumta ruh katkum kane ka hukum la maham tyngeh ba kino kino ki jinglum pisa ha baroh kawei ka District ki bym shym la ai jingbit na ka Ophis ka Deputy Commissioner ka East Khasi Hills, Shillong lane da kino kino ki bor Sorkar, la shim ba ki long kiba beain bad ki kam bymman. Kino kino kiba ioh jingbit ruh la kdew shai na ka bynta ka jingthmu bad kut katkum ka por kaba la buh.