Khang iaid kali u DC East Jaintia Hills na ka surok bah NH-6 ba shong synjor ka surok

Syllad | The Rising MeghalayaMay 31, 2024

U Deputy Commissioner ka East Jaintia Hills, u la pynmih ia ka jingmaham ban khang iaid kali shipor lyngba ka surok bah National Highway-6 namar ka jingshong synjor jong ka surok na ka daw jong ka jingjur slap bad ka jingtuid um na ki jaka lum sha kane ka surok Highway ha ka thain Lumshnong, Khliehriat.

Lyngba kane ka hukum u la ong ba la khang mardor ia baroh ki jait kali ba kin iaid lyngba kane ka surok tad haduh ban da pyndep ia ki jingpyntrei. Nalor kata u la ong ruh ba la pynmih ia kane ka hukum namar ba kane ka surok kala long kaba ma haduh katta ban iaid ban ieng bad kaba ym thikna shuh ka jingshngain jong ka.

Halor kane ka bynta la kyntu ruh ia ka Tnat National Highway Authority of India (NHAI) ba kan maramot noh mardor ia ki bynta jong kane ka surok kiba la shah ktah khnang ba ki kali kin ioh ban leit ban wan kumba ju long.

Iaki kali rit la bthah ba kin iaid noh shipor lyngba ka surok shimet kaba iaid lyngba napoh ka phyllaw jong ka Star Cement.

Namar ka jingshah ktah kane ka jaka ha ka jingshlei um, kumta ruh kane ka la pynthut shipor ia ka jingpyniasoh lyngba kane ka surok sha kiwei pat ki jylla jong ka thain shatei lammihngi khamtam shapoh Mizoram, Tripura, Manipur bad Assam.