Kem ki shipai BSF 6 ngut ki suba nongshalan masi tuh sha Bangladesh na Muktapur

Syllad | The Rising MeghalayaApril 25, 2019

JOWAI: Ki Shipai Border Security Force (BSF) kiba la shimkhia ban pynlong ka jingpahara kaba jur ban tem ïaki kam beaiñ ha khappud India-Bangladesh kila iohkem 6 ngut ki briew bad 13 tylli ki masi na ki artylli ki trok.

Kine ki 6 ngut ki briew ki dei ki trai ri bad ki dei na ka shnong Pdengshakap, Amlarem, Pynthorlangtein bad Ribhoi.

Ki shipai ïada khappud BSF kiba na ka Muktapur BOP haka 24 tarik kila bat ïaki ar tylli ki trok kiba don u register number ML 10 B 2919, ML 04 A 5108 bad haka jingkhynra ïa kine ki trok la lap ba ki kit masi.

Mar mar ki shipai kila kem ia kitei ki briew bad kurup iaki kali, ki masi kiba shongdor T.2,78,200 nalor ki mobile, pisa India bad kiwei kiwei ki tiar.

Ki shipai kila ujor da ka ejahar ha Muktapur Police Patrol Post bad la aiti iaki masi, kali bad kiwei kiwei ki tiar ba iohkurup.

Shuh shuh ki shipai BSF jong ka Nongkhen BOP haka 10 tarik une u bnai kila ioh kurup 13 tylli ki masi dap bad ha kane ka jingjia ki shipai kim shym la ioh kem ïano iano.