Kem ki BSF ia 3 ngut kynthup u nong Bangladesh na khappud, kurup T.2.32 lak

Syllad | The Rising MeghalayaOctober 8, 2024

Ki shipai Border Security Force (BSF) ka Meghalaya ha ka 7 tarik u Risaw ki la ioh ban kem noh ia uwei u nong Bangladesh bad 2 ngut ki paralok nong India bad ioh kurup noh ia ka pisa T.2.32 lak na ki bynta khappud ka East Khasi Hills.

Hadien ba la ioh ia ka jingtip kaba bniah ki BSF na ka 110 Battalion ki la ioh ban bat noh ia kawei ka kali ha ka lynti surok Ryngku-Mawsynram ha kaba ki la ioh ban kem noh ia u nong Bangladesh uba kyrteng u Mohmmad Milan Ahmed uba dei na Sunamganj district ka Bangladesh lem bad arngut ki paralok nong India.

Na kine ki shipai ki la ioh ban kurup noh ia ka pisa India T.2.32 lak ha ryngkat katto katne ki mar ki mata bad la suba jur ruh ba ki dei kiba donkti ha ki kam beain.

Hadien kane la aiti noh ia kine ki laingut kynthup ia ki mar ba la ioh kurup sha ki pulit ka Mawsynram Police Station ban pynlong shuh shuh ia ka jingtohkit kaba kham bniah.