Kbai Mooknor ka Raij Jowai ban pynkhreh ïaka Behdeiñkhlam

Syllad | The Rising MeghalayaMarch 23, 2019

JOWAI: Mynta ka sngi ki nongïalam niam ka Seiñraij Jowai kila mih na ïing ka Langdoh ban leit sha Ïawmusiang ban Kbai Mooknor ban pyntip paidbah bala sdang ka jinglehniam Behdeiñkhlam.

Ha kane ka jingpyrta shnong ha khmat ka Mooknor-Blai Ïaw la ïadonlang naduh u Dolloi ka Elaka Jowai, uba long u khlieh jong ka niam, u Langdoh, u Sangot, u Pator, ki Waheh Wasan bad kiwei kiwei.

U Chutia uba la shim ïa kane ka bynta ban pyrta shnong, ula pyntip sha ka shnong ka thaw, ka iew ka hat ba la sdang ka niam ka rukom Behdeiñkhlam bad naduh mynta ka sngi ba ym bit shuh ban rah ïaki shyieng jong kiba la ïap nabar ryngkaw (na bar ka shnong Jowai) bad ruh ban rah shabar u ryngkaw. (sha bar ka shnong Jowai) tad haduh ba ladep ka lehniam Behdeiñkhlam.

Ula pyntip ruh baka jinglehniam Thoh Langdoh kan long ha kane ka 27 tarik une u bnai ha Khloo Lyngdoh, katkum ka rukom la mana ïa baroh ki khun ka Niamtre kiba hap hapoh ka Raij Jowai ba kim ban thang ïaki jhur ki jhep, ban rep ban riang bad ban trei ban ktah.  Ula ai ka jingkyrkhu kyrdoh ïa ki nongshong ïew ban bha ka kamai kajih jong ki.