Kam u Bah Ardent ba ki paidbah ki la dep rai ban vote sha ka VPP, ai burom ia ka jingseisoh ka ‘Clean Politics’

Syllad | The Rising MeghalayaApril 17, 2024

U President jong ka Voice of the People Party (VPP) u Bah Ardent Miller Basaiawmoit haka 16 tarik Iaiong, u la kam ba ki paidbah ki la dep lypa ban shim ia ka rai ban vote ia kane ka party naduh shwa ka jingpynlong ia kane ka ilekshon Lok Sabha.

Haba aijingkren ha ka jingialang ialap ilekshon ha Mawkhar kaba hap hapoh North Shillong constituency, u Basaiawmoit u la ong, “Kane ka dei ka sien kaba nyngkong ba ki paidbah ki la dep shim lypa ia ka rai naduh ki ar lai taiew ba ladep shwa jong ka ilekshon ban vote ia ka VPP. Kane ka dei ka jingjop na ka bynta jong ngi kum ki nongialam namar barabor ki paidbah ki ju shim rai shi sngi shwa ka ilekshon bad hateng ki shim rai tang namar ba ki la shim pisa. Hynrei, ha kane ka kynti kaba mynta ki jinghikai jong ki nongialam ka VPP ki la iarap ia ki paidbah ba kin shim rai da ka jingsngewthuh ha ka por ilekshon ban ym vote tang na ka bynta ka pisa.”

Haba kren halor ka ‘Clean Politics’ ne ka jingialap ia ka sain pyrthei kaba khuid bad ka jingsynshar kaba khuid, u Bah Ardent u la ong ba u la shim ia ka rai ban iehnoh kum u president jong ka Seng FKJGP bad mih ia aireng ha ka MLA ilekshon ha u snem 2003.

 “Nga la leit ban tyrwa kum u kyrtong sha ki paidbah ka Nongkrem ba kin ailad ia nga ba ngan shakri ia ki. Nga la leit bad iathuh hok beit ha ki ba Ngam lah ban ai pisa ia phi, Ngam lah ban ai kyiad ne ia khawai dawai. Nga la ong ruh ia ki paidbah ba lada ki vote ia nga wat shityngka ruh ka pisa kaba dei hok ka jong nga ngan nym ai ia ki bad shityngka ruh ka pisa kaba dei na ka bynta jong ki ngan ym shim satia. Nga ong ia kane namar nga tip ba lada ki paidbah ki vote ia nga kum u MLA, ngan hap ban im katkum u pud, Ngam kwah ban iakhun bad no bad no ruh na ka bynta ban ioh pyntrei ia ki kam kontrak. Ki paidbah ka Nongkrem ha u 2003 kim lah ban pdiang ia kaba kum kane ka jingialap ‘Clean Politics.’

 “Hadien ka ilekshon, Nga la leit ban shong ban sah sha Nongkrem constituency namar Nga la kular ia ki paidbah ba lada nga jop ne rem ngan ym iehnoh iaphi. Kumta Nga la sdang ban pynsngewthuh ia ki kumno ban jied MLA. Kumta ki la jied ia Nga arsien kynthih, kata ha u snem 2008 bad 2013 bad Nga la shah rem noh ha u 2018. Ngan nym ong ba ka dei ka jingsniewbok. Haba Nga rung sha ka kam politics ha u 2008, Nga sngewthuh ba tang ka politics kam pat biang satia, bad dei na kata ka daw Nga sngewthuh ba ngi donkam ia ka ‘Clean Politics.’ Ngi la sdang ia ka jingialap halor ka ‘Clean Politics’ ha u snem 2010. Kiba bun ki la ong ba kan ym lah ban urlong kane ka ‘Clean Politics.’ Ki la don ruh ki riew sain pyrthei kiba la aijingmut ia nga ba ha ka politics, lada phim lah ban jop, pyniasoh bad ki. Hynrei da kaba burom ia ki, Nga la ong em, lada ngam lah ban jop, Ngan iehnoh, Ngan ym lah ban pyniasoh bad ki,” ong une u nongialam ka VPP.

Shuh shuh u la kam ruh ba ki paidbah ki la phaikhmat ia kane ka jingialap halor ka ‘Clean Politics’ bad dei na kata ka daw ki la ong em ia ka pisa na ka bynta ban vote khnang ban pynthikna ia ka jingsynshar kaba khuid.