Ka War Jaiñtia kaba sniew bok tam na ka jingwan ka ICP; ym pat ioh bai musur khyndew ki trai jaka & phah kynran ka Bangladesh

Syllad | The Rising MeghalayaMay 7, 2019

DAWKI: Ka jingthmu ban tei ïaka Integrated Check Post (ICP) ha Dawki, West Jaiñtia Hills District ka dei ka nusip jot ïaka War Jaiñtia baroh kawei bad kaba sngewlehraiñ shuh shuh ka dei ba ki trai khyndew haduh mynta kim pat ioh ka bai musur khyndew na ka sorkar jylla.

Kane ka ICP kaba dei peit da ka Land Ports Authority of India (LPAI) la plie paidbah ha ka 24 tarik u Kyllalyngkot 2017 bad la mang ban pyndep ha u bnai Nailar 2018 haka jinglut T.92.34 klur haka jaka kaba heh haduh 22 Acres.

Kane ka ICP ka don ha lynti ban leit sha ka shnong Muktapur na Tamabil, hynrei kane ka jingthmu ban tei iaka kad khaii kala sangeh mynta namar bala mih bun bah ki kynram kynram nalor ka jingbym ioh bai musur khyndew ki trai jaka, ka Ri Bangladesh ruh kala phah kynran ïa kane ka ICP na ka jaka ba don kham shadien namar ba kala jan palat sha u pud bad la ong ban kan wanrah ka jingkhapngiah kaban ktah iaka khaii hadpeng ki ar tylli ki Ri.

Ym tang katta ka jingsahkut kane ka jngpyntrei ïaka ICP ka dei ruh ba ka don ka mukotduma ha Meghalaya High Court hadpeng ka TK Engineering kaba shim kontrak ban tei iaka ICP pyrshah sorkar India bad kiwei kiwei namar ba kala shah pyndam trei bad shah ba ka slem ban pyndep iaka jingtrei bad kiwei kiwei.

Mynta kane ka jingbym iaid shakhmat ka jingpyntrei ïaka ICP kala pynkynduh mawsiang ïaki nongshong shnong ka thain War Jaiñtia naduh Tamabil, Amlympiang, Amdoh, Rhongkum, Amsku, Muktapur, Syndai, Hawai Bhoi bad kiwei kiwei ki shnong namar ba ka surok ban iaid sha kine ki shnong na Tamabil kala kylla surok ktieh bad sniew palat liam kaba buh jingeh iaki kali motor bad ki briew ban iaid ban ieng.

Ka jingbun ki trok kit maw, mawsalin khlieh la ka sngi kala wanrah ka jingsahkut kali ha katei ka jaka. Ki kali rit kim lait ban iaid iaka surok kaba ktieh kaba dap da ki thliew ki syar bad bun sien ki paidbah kim lah ban pynpoi iaki marrep jong ki sha iew bad hap leit phai shala shnong.

Halor kane ka jingsniew ka surok na kaliang ka JSU War Jaintia Circle kala dawa na u nongmihkhmat ka thain bad ka sorkar ban shna noh ïa katei ka surok ban suk ka iaid ka ieng u paidbah. La dawa ruh na ka sorkar jylla ba kan tuklar ha kaba iadei ban ka jingsahkut ka jingtrei ïaka ICP.