Ka Sorkar Pdeng ka dei ban iasyllok bad ka Jylla ha kaba thung ia u VC ka NEHU: Ampareen

Syllad | The Rising MeghalayaNovember 27, 2024

Ka Myntri ka Sorkar Jylla kaba dei ruh ka nongaiktien ka MDA, ka Kong Ampareen Lyngdoh ha ka 26 tarik Naiwieng ka la pynpaw halor ka jingdonkam jong ka Sorkar Pdeng ban iasyllok bad ka sorkar Jylla halor ka jingthungkam khamtam ha kaba iadei bad u Vice Chancellor jong ka skulbah North Eastern Hill University (NEHU).

Haba kren sha ki lad pathai khubor, ka Myntri ka la ong, “Ka long kaba sngew bynniaw jur..Lehse ka long kaba kongsan ia ka Sorkar Pdeng ba kan iasyllok ba ka sorkar Jylla halor ki mat thungkam khamtam ha kaba iadei bad u VC ka NEHU, namar lada iasyllok bad shim ia ka jingai jingmut ka sorkar Jylla kumta ruh phin lah ban kiar na kiba kum kine ki jingmih jong ka huri hura bad phi lah ban don ia ka jinglong jingman kaba iaid beit iaid ryntih ha ka skulbah baroh kawei.”

Ka Myntri ka kyrmen ruh ba ka Committee jong ki arngut ki dkhot ba la thung da ka Ministry of Education kan wanrah ia ki jingai jingmut kiba khlain khnang ban weng ia ki jingeh bad ki mat ba la pynpaw da ki kynhun ki samla pule.

“Nga thikna ba ki samla pule ki la mad ia kane ka jingbym iahap jingmut mynta la slem bha, bad nga sngew skhem ba ki samla pule ki la hap ban shim da kane ka sienjam jong ka jingiakhih kaba la iaid da ki bun taiew, ki bnai lehse da ki snem,” ka la ong.

“Nga kyntu ia baroh ki kynhun kiba don bynta khamtam ia ka kynhun kaba la wan ryngkat ka bor na ka Ministry ba kin leitphai bad ban wan ha ryngkat ka rai kaba khatduh bad halor ka jingdonkam ban kynthup ia ka Jylla ha ki kam ban jied ia u VC khnang ban pynthikna ia u kyrtong ba shah jied ki dei ban long kiba biang ban wan sha ka jaka kum sha ka Jylla Meghalya kaba iapher na kiwei pat ki jylla,” ong ka Myntri.

Ka la bynrap ruh da kaba ong, “Ka long kaba kongsan ia ka sorkar India ba kan shim ia kane ka khubor ba ki paidbah ka Jylla Meghalaya ki dei kiba pher ha kiba bun ki rukom, khamtam ki samla pule.”

Haba kylli, ka Myntri ka la ong ba kan bha shibun lada ailad ia ki trai shnong khamtam kito kiba la biang ha ka kyrdan ba kin shimti ia ka kam ban lah ban shakri kham bha ia ki paidbah ka jylla ka jong ngi. Nalor kata ka Myntri ka la ong ruh, “Nga kyrmen ba yn lah ban weng ia kine ki jingeh, Nga sngew kmen ba u Myntri Rangbah ka Jylla kumjuh u Myntri ka Tnad pule puthi ruh ki la shimkhia bha ia kane ka kam ha kaba ki la pynbor ruh ia ka Sorkar India ban shim ia ki sienjam khnang ban lah ban pynbeit noh kham kloi ia kane ka jingeh khnang ba ka jingtreikam ha kane ka skul bah kan long kaba iaid beit iaid ryntih.”