Ka Sorkar MDA kaba khlem bniat, shah pyniaid ha ki kharkhana dewbilat ong ka synjuk ki trok

Syllad | The Rising MeghalayaNovember 7, 2020

Ka Sorkar Meghalaya Democratic Alliance (MDA) kadei kaba khlem bniat bad kaba shah synshar ha ki kharkhana dewbilat ha Rilum Jaintia.

Kine ki kyntien ki dei kiba la thoh ha ki placard kiba rah da ki dkhot jong ka JAC kiba iakhih pyrshah khlem buh por ban dawa ban pyntreikam iaka dor bai kit bai bah dewbilat thymmai kaba la pynbna ka sorkar jylla naduh 25 tarik u Nailur 2020.

Ka kynhun jong ka JAC kila mih sha surok ban rah da ki placard kiba kynthoh pyrshah iaka sorkar MDA bad pdiang ia u Myntri Rangbah Conrad K Sangma hynne ka sngi ha Tuber.

U Myntri Rangbah u la wan hiar sha Rymbai ban plie paidbah ia u mawnongrim ban tei iaka skul Rymbai Govt. Secondary School.

Ka JAC kaba kynthup Jaintia Hills Truck Owners and Driver Association (JHTOA), Meghalaya Truckers Union (MTU) bad ka All Jaintia Hills Clinkers and Cement Association (AJHCCA) kila sdang iaka jingiakhih kaba khlem buh por haka sngi Palei bad pynphai ia baroh ki trok kiba kit dewbilat ha Tuber Shohshrieh, East Jaintia Hills District.

Ka dor ba la pynmih da ka sorkar Jylla haka 25 tarik Nailur (September) 2020 haka jingpynbna (Notification) NO.TPT.91/80/813 ka la pynthymmai ïaka dor bai kit mar ki trok kata T.7 haduh T.11 shi kilometre shi ton ha ki surok rong, T.8 haduh T. 12 shi ton shi kilometre haki surok maw bad T. 10 haduh T. 12 shi ton shi kilometre ha ki surok khyndew.

Ka synjuk ki nongsain dewbilat ka Jaintia Hills Cement Manufacturer Association (JHCMA) kila pdiang ban pyntreikam ia kane ka dor thymmai tang ha Jylla.