Ka Sorkar kam don jingthmu ban shna jaka theh niut ha Mawkhanu

Syllad | The Rising MeghalayaMarch 13, 2025

Ka sorkar Jylla kam pat don satia ia ka jingthmu ban shna ia ka jaka theh niut katkum ka juk stad saian hapoh ka shnong Mawkhanu kaba hap hapoh New Shillong Township.

“Ka sorkar kam pat don jingthmu satia ban wanrah ia ka jaka theh niut kaba katkum ka juk saian ha katei ka jaka,” ong u Symbud Myntri Rangbah uba khmih ia ki kam pynroi sor, u Bah Sniawbhalang Dhar haba jubab hapoh ka Iingdorbar hynne ka sngi 13 tarik Lber.

U MLA ka VPP na Mawlai u Bah Brightstar Marbaniang u la aijingmut halor ka jingdonkam ia ka sorkar ba kan shna ia ka waste management plan na ka bynta ka Mawkhanu. Katkum ka jingpynpaw jong u, u la ong ba ka sorkar ka la dep ban thied ia ka jaka kaba haduh 800 akar ha Mawkhanu.

Haba jubab ia kane u Bah Sniawbhalang u la ong ka daw ba ka sorkar kan ym shna ia ka jaka theh niuh ha Mawkhanu namar ka la tyrwa ia ka jaka kaba thymmai ha Nonghali, kata da kaba bynrap ba ka jaka kaba donkam ban pynlong ia ka jaka theh niuh ka long hapdeng 100 haduh 150 akar.

Nalor kata u Symbud Myntri Rangbah u pyntip ruh ba kam pat don satia kano kano ka jingthmu ban pynkylla ia ka jaka sha ka European Ward da kaba bynrap ba ka sorkar ka dang pynkhreh ia ka master plan.

Shuh shuh u la jubab ruh ba ym don satia ki nongbuhai shnong beain ha ka thain Mawkhanu haba kular ia u MLA ka VPP na Nongkrem u Bah Ardent Miller Basaiawmoit ba u long uba la khreh ban pynlong ia ka jingleit jurip sha katei ka jaka.