Ka Sorkar ka pyrshang ban pynurlong ia ka jingdawa ki nonghikai SSA, pyrkhat ruh ia ki khynnah skul: Rakkam

Syllad | The Rising MeghalayaOctober 16, 2024

U Myntri ka Tnad Pule Puthi u Rakkam A Sangma ha ka 15 tarik Risaw u la ong ba na ka liang ka Sorkar ka la bteng ban wad ia ki lad ki lynti ban pynurlong ia ki jingdawa pynkiew tulop jong ki nonghikai SSA kaba long 100 percent na ka bynta ka jingshngain ha ka jingshakri da kaba kyntu ruh ia kine ki nongiakhih ba kin pyrkhat lem na ka bynta ka bha ka miat jong ki khynnah skul da kaba leit phai sha la ki jong ki kam.

Haba kren sha ki lad pathai khubor, u Rakkam u la ong ba ka rai ban pyniew tulop ia ki palat 13000 ngut ki nonghikai SSA ka dei ka mat ka bym lah ban pynurlong noh mar mar namar ka jingtyrkhong pisa jong ka sorkar Jylla.

“Hynrei ngi dang pynkhreh ia ki sienjam. Ngi la shong jingialang ha ka taiew ba ladep bad u Myntri Rangbah ka Jylla u Conrad K Sangma, bad ngin sa shong biang. Ngi la dep ban bthah ia ki ophisar ba kin pynkhreh ia ka formula kumno ban pyntreikam ia ki lad ki lynti ban lah ban weng ia kine ki jingeh jong ki nonghikai SSA ha ka Jylla,” u la ong.

Une u Myntri u la kyntu ruh ia kine ki nonghikai ba kin leitphai pat sha la ki jong ki skul da kaba ong,”Nga sngewsih ba ki nonghikai jong ngi kin shong sha surok ne madan ialehkai, hynrei ha kawei ka liang nga don ruh ka jingsngew na ka bynta ki khynnah skul, ha kaba ki dei ban leit hikai. Hynrei, mynta haba la plie biang ia ki skul, Nga kyrpad ia baroh ki nonghikai ba kin leitphai noh sha la ki jong ki skul, pyrkhat ruh na ka bynta ki khynnah. Ki khynnah ki lah ruh ban dang ap ia ki ha ki skul.”

Ha kawei pat ka liang ka jingiapait iapra hapdeng ki nonghikai SSA ka la paw shai bha mynta hadien ba kawei ka kynhu jong ka Meghalaya SSA Schools Association (MSSASA) ka la ai por ar bnai ia ka sorkar ba kan wanrah ia ka policy ba  ka Sorkar kan shimti noh ia ka jingshakri ki nonghikai SSA, katba kawei pat ka kynhun, ka All Meghalaya SSA School Teachers’ Association (AMSSASTA)  ka la pynlong ia ka jingiakhih shong kyllain mungor kaba la iaid mynta 15 sngi ban dawa pynkiew mardor ia ka tulop kaba 100 percent ia ki nonghikai SSA.

Haba pynpaw ba baroh ki artylli ki jingdawa ki dei kiba shongshok, une u Myntri u la ong pat ba ka jingiapait iapra hapdeng ki juh ki para nonghikai SSA kam dei satia ka dak kaba bha.

Ha kaba iadei bad ka jingkynthoh ba ka Sorkar kam shym la khot iakren ia ki nonghikai ba pynlong jingiakhih, u Rakkam u la ong ba ka Sorkar ka la dep iakynduh la bunsien bad ba ka jingkhang jong ka ka bteng ban plie na ka bynta jong ki ban iakren. Hynrei, ka sorkar ka la hap ban phaikhmat shwa ia ka bynta kaba kongsan kaba iadei bad ka jingjia jong ka jingshlei um ha Rilum Garo kaba la shim ruh ia ka jingim jong bun ngut ki mynsiem briew.

Na ka liang une u Myntri u la ong ba ka jingkyrduh pisa jong ka Sorkar Jylla ka dei ka mat kaba kongsan, da kaba bynrap ruh ba kam long kaba suk ia ka sorkar ba kan shim ia ka rai ha ka shisien shim halor ki jingeh kaba la mih naduh ka sngi kaba nyngkong.