Ka Sorkar ka dei ban pynkynriah ia ki jaka thoh tim ba don hapoh 100 mitar na ki jaka pule bad jaka mane Blei

Syllad | The Rising MeghalayaMarch 15, 2025

Ka Sorkar Jylla ka la shah aijingmut ban pynkynriah ia baroh ki dukan ne counter thoh tim (teer) kiba treikam ha ka jingjngai  kaba hapoh ka 100 mitar najan ki jaka pule puthi bad ki jaka mane Blei.

“Ka Tnad ka dei ban pynthikna ban pynkynriah ia baroh ki counter thoh tim kiba treikam ha ka jingjngai kaba hapoh ka 100 mitar najan ki jaka pule puthi bad ki jaka mane Blei kiba hajan eh,” ong ka Comptroller and Auditor General of India (CAG) ha ka kaiphod jong ka halor ka khajna jong ka jylla na ka bynta jong u snem ba kut ha ka 31 tarik Lber 2023 ba la wanrah hapoh ka ïingdorbar thawaiñ ha ka 13 tarik Lber.

Hapoh ka kyndon 6 (1) jong ka Meghalaya Regulation of the Game of Arrow Shooting and the Sale of Teer Tickets (MRGAS&STT) Act, 2018 (as amended in 2019), ki counter ba die ia ki slip ne tiket tim ki dei ban don ha ka jaka kaba ym dun ia ka 100 mitar ka jingjngai na ki jaka pule puthi bad ki jaka mane Blei kiba jan eh.

Ha ka por jong ka jingleit jurip ryngkat lang na ka bynta ka jingpynshisha ha kaba iadei bad ka jingdon jong ki counter pynthoh tim palat ia u pud ba la shah kumba la kdew, ka Audit ka la peit bniah ia ki 42 tylli ki counter kiba die ia ki slip ne tiket tim ha kylleng ki hynriew tylli ki jaka ba hap ha ka ST, da kaba pynshong nongrim ha ka jingjied kaba naphang.

Napdeng ki 42 tylli ki counter pynthoh tim, 31 tylli ki counter ki dei kiba treikam ha ki jaka ba la khang pyrshah, ong ka kaiphod.