Ka Sorkar BJP ka kwah ban bat ka JIO Company marwei ïaka jingshakri mobile: Vincent Pala

Syllad | The Rising MeghalayaMarch 29, 2019

WAHIAJER: U Kyrtong jong ka Seng Congress u Ma Vincent H Pala u la ong “Ka Sorkar BJP ka thmu ban pynlong ïa ka company JIO tang marwei ban leh trai khlieh ban pynïaid ïaki mobile phone ha ka Ri India baroh kawei”.

“Mynta ka jingshakri jong ki company mobile phone kum ka AIRTEL ka BSNL ki la sniew bha katba ki company kum ka AIRCEL bad ka IDEA kila duh jait syndon bad tang ka JIO hi kaba ka ïaid iew bad kaba ai jingshakri kaba bha na ka daw jong ka jinglehbha jong ka Sorkar BJP ia ki trai jong ka kompani JIO”, u la ong Ma Vincent MP Lok Sabha Shillong Parliamentary Seat uba la jop la arsien kynthih ha ka jingialap elekshon jong u mynta ka sngi ha Iawpynsin Wahiajer.

Haba kren shuh shuh ula ther ïa ka sorkar BJP ba kam shym la burom ïa ki sngi kyrpang jong ki Khristan namar ha ka Sngi Christmas la pynbeit ban pynlong da ka ‘Good Governance Day’ bad ha ka Sngi Good Friday kum ka ‘Digital Day’.

U la ïathuh shuh shuh ba ha ka por ba synshar ka Sorkar Congress ka kam ban pynrung ïa ka ktien Khasi haka Eight Schedule ka la iaid shait shait, hynrei ka Sorkar BJP kam patiaw satia ïa kane ka jingdawa jong ki paidbah ka Ri Khasi Jaiñtia.

Halor ka Bill ban wanrah ia ka jingpynkylla jong ka Sixth Schedule bala leh da ka Sorkar BJP, u Kyrtong ka Congress u la iathuh ba hadien ba u pule sani bha ïa katei ka Amendment Bill kaba 74 sla; u la shem ba ka Sorkar BJP ka la pyntlot bor ïa ka Sixth Schedule bad kan sa wanrah ia ka jingma kaba khraw ia ki Khasi Pnar lada ka kylla ain haka dur ban shna ka Sorkar BJP.

U Ma Vincent u la ïathuh ba u la wanrah ia ka Coaching Centre na bynta ki samla ban ïakhun ia ka IAS, MCS, MPS bad kiwei de ha Nongbah Shillong bad u la wanrah ia ki kompeni airlines ban pynrung kam pynrung jam ia ki samla jong ka jylla bad kumjuh ruh mynta ki samla na ka jylla ki la ioh kam ha ki Hotel bah bad ha ki tnad pulit CISF, CRPF bad Delhi Police na ka daw ka jingtrei shitom jong u.

Haba kyrpad ia u paidbah ban kyrshan ïaka Congress, u kyrtong jong ka Congress u la ong ba ka party ka don haduh 2 lak ka vote jong ka, hynrei ka dang donkam sa 5 lak vote ban ioh jingjop namar ka vote baroh jong ka Shillong Parliamentary constituency ka don 12 lakh.

U President jong ka Congress West Jaintia Hills District bad u MDC ka Jowai Central u Ma AA Shullai, u MDC ka Barato-Mukroh u Ma Aiborlang Shadap, u Chairman barim ka JHADC u Ma Laitsing Shylla bad kiwei ki la ai jingkren ban pan ka jngkyrshan jong u paidbah ban pynjop iaka Congress.

Ha kane ka juh ka sngi u ma Pala ula hiar sha War Jaiñtia ban leit pan ka jingkyrshan jong u paidbah ka thain.