Ka sorkar ba ialam da ka NPP ka dei kaba shlur, ka shim ia ki mat kiba shem jingeh, ong u CM ka Jylla

Syllad | The Rising MeghalayaApril 3, 2024

U Khliehduh jong ka Seng National People’s Party (NPP) hapoh ka Ri uba dei ruh u Myntri Rangbah ka Jylla u Conrad K Sangma haka 2 tarik Iaiong, u la ong ba ka sorkar Jylla hapoh ka jingialam ka party jong u ka dei ka sorkar kaba shlur namar ka lah bad nud ban shim ia kiba bun ki mat kiba shem jingeh, kata ia kiba ki sorkar kiba la leit noh kim shym la shlan ban leh.

Haba aijingkren ha ka jingialang ialap ilekshon ban pan jingkyrshan na ka bynta ka kyrtong jong ka party ka Kong Ampareen Lyngdoh napoh Shillong parliamentary constituency ha Ladthadlaboh, Jowai, u Sangma u la ong, “Ngi kum ka sorkar ngi don ia ka jingshlur, Nga ngeit ba ngi don ia ka jingshlur ban shim ia ki mat kiba shem jingeh ia kiba kiwei pat ki sorkar kiba la leit noh kim shym la shlan ban leh.”

Ha kane ka sngi u Sangma u la pdiang sngewbha ruh ia kiba bun ngut ki nongialam kiba dei na ka seng Congress, BJP bad ka TMC sha ka seng jong ka NPP.

Kine ki nongialam ki kynthup ia u MDC ka BJP napoh Sumer u Bah Krison Langstang, ki kyrtong MLA ka Congress na Mawkaiaw bad Jowai u Bah Nehemayah Tyngkan bad u Daniel Dann, u kyrtong MLA ka TMC u Bah Lasting Suchiang nalor kiwei pat.

Haba kdew halor ki nongrim ba shlur kiba ka sorkar ka ieng, u CM u la iai ban halor ka jingtrei borbah jong ka sorkar na ka bynta ban ai ka jingshakri ia u paidbah ka Jylla bad ban khmih na ka bynta ka bit ka biang ka jong ki. “La ka long ha kaba iadei bad ka mat ne ishu Them Metor, ka jingtei ia ka iingdorbar Assembly ngi la shim kam. La ka long halor ki kam khappud ngi la iaid shakhmat, la ka long halor ka kam dewiong ruh ngi la leh ia kaba donkam, kata nalor kiba bun kiwei pat ki mat,” ong u Conrad.

“Ki don kiwei pat ki party sain hima kiba shu pynksan ia kiei kiei ki bym don nongrim. Ngim kwah ban iakren ia ka ktien Hindi. Shah ngan iathuh ha phi ba mar ia jam ia ka Khanapara, Ngan hap ban kren tang da ka ktien Hindi. Lada phi leit sha Parliament phin hap ban kren tang da ka Hindi. Phin hap ban sngap ia ka ktien Hindi. Lada phi kwah ban weng ia ki jingeh halor ki kam khappud phin hap ban kren kumjuh,” ong u Sangma haba pynpaw ka jingsngewkhia halor ka mat kaba iadei bad ki jingiapher ha ka ktien.

“Kaba ieit ia lade bad iala ka jong ka ktien kam mut ba phin isih noh ia kiwei. Kane kam dei kaba ka Niam ruh ka hikai ia ngi. Ngam ngeit ia kaba kum kane, u la bynrap da kaba kyntu ruh ban don ia ka jingiaburom bad ka jingiasngewthuh jingmut.”

Haba pynpaw beit beit sha kiwei pat ki party sain hima, u CM u la iai ban halor ka jingdonkam ban pdiang ia ki jait ktien bad kolshor bapher bapher. “Kaba ieit ia lade bad ia ka ktien jong phi kam mut satia ba phin isih noh ia kawei,” u la pynpaw da kaba kyntu ia ka jingiatylli lang hapdeng ki jingiapher. Watla katta u la kynthoh ia kiwei pat ki party sain hima namar ka jingduna ha ka jingsngewthuh bad ka jingkut jingmut ban kren halor ki kam kiba kongsan kum ha kaba iadei bad ki kam ia kajia pud.

Da kaba iai ban halor ka jingtrei shitom jong ka sorkar ban weng ia ki jingeh bad ban pyniaid shakhmat ia ki kam pynroi jong ka Jylla, u CM u la khot ia ka jingiatylli bad ka jingiatreilang hapdeng ki nongialam bad ki paid nongkyrshan. “Ngi donkam ia ki dkhot ka parliament jong ngi hapoh Delhi ba kin iakhun halor ki mat ne ishu kiba ngi don, kata kum halor ki kam khappud, ka Khyrnit ba Phra bad halor kiwei pat ki mat bapher bapher kiba iadei bad ki kam pynroi bad ki jingpynioh ia ki skhim bapher bapher,” bynrap u Conrad.

Dei na kata ka daw lada ka Kong Ampareen ka kyrtong ka party na Shillong Constituency kan ioh ia ka jingkyrshan jong baroh ki nongialam bad baroh kiba la ia don lang ha kane ka jingialang, kumta ruh ryngkat lang bad ka MP na Tura ka Agatha Sangma bad ka sorkar Meghalaya, Nga sngew thikna ba ngin iatreilang kum ka kynhun bad ban pyniaid shakhmat ia ka Jylla,” ong shuh shuh u CM ka Jylla