Ka Shuki ka dei jong ka NPP ka kjat jong ka UDP: Lahkmen Rymbui

Syllad | The Rising MeghalayaFebruary 24, 2019

JOWAI: U Ma Lahkmen Rymbui MLA ka thain War Jaiñtia bad u Myntri sorkar ula ong ba ym don MLA NPP kiba lah ban wanrah skim da ki klur tyngka ïaka Rilum Jaiñtia lait na ka UDP, kumta u khot u wer ïaki paidbah ban pynjop donburom ïa u kyrtong ka UDP Jowai South u Ma Moonlight Pariat ba kin ïoh ban treilang ban theh shuh shuh ki kam pynroi.

Haka sorkar MDA “ka shuki ka dei jong ka NPP, hynrei ka kjat kadei jong ka UDP”, la ong u ma Lahkmen haka jingïalang ïalap ba khatduh jong u Ma Pariat kaba long ha Chyrmang haka sngi U Blei.

U MLA ka thaiñ ula kyrpad ïaki nongshong shnong ka Chyrmang ban pynjop donburom ïa u ma Moonlight, namar ba u dei u briew uba shemphang bad tbit haka kam politik bad um don jingartatien ba un poi thong.

“Naduh Muktapur haduh Chyrmang nga ioh duna eh ka vote na kane ka shnong Chyrmang, hynrei ki kam pynroi kiba nga la theh tang ha kine ki khyndiat bnai haka shnong Chyrmang kala kot T.5 klur ban kyntiew ïaka “law kyntang ka Chyrmang kum ka jaka jngohkai ba pawnam khlem ka jingpeit shilliang namar ba nga kwah ban kane ka shong ka kiew haka kamai ka kajih bad ka lad ïoh kam ioh jam”, la ong u Rymbui bad ula ong ba nalor kane ka T. 5 klur kiwei kiwei ki kam pynroi ba ula ai kadei sha ki 8 tylli shnong kaba la kot da ki phew lak.

Wat shah pynbiej haka jingphon jingpah ba shisngi shitaiew kiwei ki party, hynrei bishar bin pa bin ban jied ïa u nongmihkhmat ba lah ban trei na ka bynta ka miat ka bha ka shnong ka thaw.

Ka JHADC kan khie rasong lada phi ki paidbah phi jied ïaki nongmihkhmat kiba tbit bad shemphang ban khyrwait shabi ïaka synduk pisa jong ka sorkar pdeng. Ka Sorkar pdeng dang shen kala mynjur ïaka jingpynkylla thymmai (Amendment) ïa ka Sixth Schedule bad kane kan iarap ïaka konsil ban khia ka pla tyngka, hynrei ka donkam pat ïaki nongmihkhmat kiba trei shitom kumnoi ban pynpoi ïaki kam pynroi sha u paidbah, la ong u Ma Moonlight Pariat.

Ula ong ïaki paidbah ba kim dei ban shah pynbieij haka tyngka pliah ka NPP, namar ba ki briew kiba don haka NPP kila kylla long kiba lalot bad ki ba khwan myntoi shimet.  “Wat khih paloh ki jingmut jingpyrkhat jong phi haka tyngka pliah ba shisngi namar ba kane ka pisa ka dei tang ban khring ïaka vote jong phi, marsien jop baroh ka pisa kan leit sha ka pla jong ki”, ula ong u Ma Pariat.

Ula ong shuh shuh ba haki shi samoi ba ula long u MDC ka thaiñ Jowai South hadien ka jingphiah MDC constituency ula pyrshang ban theh ki kam pynroi ban pynbha ïaki skul ki lynti ïaid kjat bad kiwei, hynrei um pat hun bad u dang kwah ban wanrah shuh shuh ki kam pynroi ha Chyrmang, Iongnoh, Mupyut ter shaduh Thangbuli ba kin iaryngkat kyrdan ban ki shong kiba don ha sor Jowai bad ula pan ka jingkyrshan u paidbah ban pynpoi ïa u sha ka thong.