Ka Shnong Rymbai ka ‘Digital Village’ ha East Jaiñtia Hills District

Syllad | The Rising MeghalayaMarch 30, 2019

JOWAI: Ka Shnong Rymbai, East Jaiñtia Hills District kala shah jied ha ka Sorkar India kum ka ‘Digital Village’. Ka Shnong Rymbai kadei kaba nyngkong eh ba shah jied na East Jaiñtia Hills District kum ka Digital Village kaba ki nongshong shnong kila pyndonkam ïaka kor Computer bad Internet.

Ha Meghalaya ki don 11 tylli ki Digital Village bad ha Rilum Jaiñtia ka Raliang bad Rymbai ki dei ki ar tylli kiba la ioh ka nam ‘Digital Village’.

Ka Shnong Rymbai, da ka jingshah jied kum ka ‘Digital Village’, ki paid nongshong shnong kin ïoh shuh shuh ka lad jinghikai ha kaba iadei bad ka Computer course, ki jingthep form online, ka jingtreikam ki Bank, ki Solar Light LED, ka jinghikai skul lyngba ki digital technology bad kiwei kiwei de ki kam lyngba ki Common Service Centre.

Ka sorkar pdeng kala buh thong ba ha kine ki shi snem ban wan lyngba ka Ministry of Electronic and Information Technology kan jied shi lak tylli ki shnong ban pynkylla kum kita ki Digital Village ha Ri India. Ia ka Shnong Rymbai la jied ryngkat ka jingïatreilang ka Kong Releaseme Sympli, VLE (Village Level Entrepreneur) jong ka Digital Seva CSC Rymbai.

Kum ka dak ban lehkmen ïa kane jingioh nam Digital Village ka shnong Rymbai, la pynlong ïaka jingïalang haka jingïadonlang u Ma Justice Lyngdoh, Waheh Shnong Rymbai uba pyniaid ruh ïaka jingialang, u Ma Lincoln Nixon Dkhar, Kyrmen Chyrmang na SBI (Ladrymbai Branch) uba la batai shaphang Financial Inclusion (Ka jingiadei u paidbah bad ki bank haka jingim ba man la ka sngi ban kynshew pisa bad khaïi).

Kiwei kiba ïadonlang Ma Elios Swer, Dalloi jong ka Elaka Rymbai, U Ma Helpman Phawa bad Kong Regina Sympli, District Manager CSC E- Governance Services India Ltd bad ruh I Kong Releaseme Sympli ka VLE jong ka Rymbai CSC, U Bah Joshua H. Lyngdoh State Head jong ka CSC E- Governance Services India Ltd, uba la pynshai ïaki jingmyntoi ba ïoh lyngba CSC bad ula kyntu ïaki nongshong shnong ba kin ia treilang bad ka CSC khnang ba ki shnong ki thaw kin myntoi.