Ka shnong Iongnoh kawei pat ka jaka jngohkai kai ha Rilum Jaintia

Syllad | The Rising MeghalayaNovember 8, 2020

Katba nangmih ki sngi kila nangmih ki jaka jngohkai pyrthei kiba ki nongshong shnong kila shim iaka sienjam ban pynbha ïa kaei kaba ka mariang kala thaw lypa. Bunsien kine ki jaka kiba lah ban khring ïaki nongsuwari ki dei kiba la sdang hi da ki paidban khlem kano kano ka jingïarap ne kyrshan da ka sorkar. Bad kine ki don ha kiba bun ki than hapoh kane ka jylla Meghalaya.

Kawei na kita ki jaka pynpyngngad mynsiem ka dei kaba la tip kum ka Motha Kyrsong Water fall kaba don haka dong Wahbiar haka shnong Iongnoh B jong ka West Jañtia hills district.

Ka shnong Ïongnoh ka dei ka shnong kaba don hapoh ka block Thadlaskeñ bad ka jngai tang kumba 14 KM nak sor Jowai. Ban ïaid shaka shnong Iongnoh ka dei naka surok Jowai Amlarem Dawki road bad hap ban khun haka lad Mustem bad ïaid lyngba ka shnong Mustem khnang ban poi sha kane ka shnong.    

Ka Shnong Mustem ruh kadei kawei pat ka shnong kaba don ki kshaid bad ki khlaw kyntang kiba la iada kyrpang da ka jingiatreilang ka tnad kam Khlaw Wildlife Division bad ka jingkyrshan borbah u MLA ka thain ma Lahkmen Rymbui ban pynkylla ia ki kum ki jaka jngohkai.

Kane ka Motha Kyrsong Water fall ka jngai kumba 1 KM naka jaka ba kut ka surok rong bad haka por tlang ki kali ki lah ban wan kham shajan shuh. Ka jaka biang bha naka bynta kiba sngewtynnad ban ïaid kjat bad ki briew ki lah ban ïaid lyngba kane ka jaka wat shaduh shaka wah Myntdu. Ka jaka biang bha ruh ïa kiba kwah ban bam khana (picnic).

U ma Sanki Shylla u dei u trai jong kane ka jaka, hynrei uba la kynthup bad khotlang ïaki nongshong shnong jong ka shnong Iongnoh baroh kawei ban iatreilang bad ban pyniaid ia kane ka jaka ban kyntiew kum ka jaka jngohkai lyngba Multi-Purpose Cooperative Society kaba kynthup ïa ki 25 ngut ki dkhot.

“Ka jingthmu jong nga ka long ban pynïohkam ïaki samla jong ka shnong bad ki don ki samla haka shnong kiba la pyndep ïaka jingpule haka Tourism bad kumjuh ruh kiba la dep ïaka training kum ki guide. Kine baroh ki don hapoh ka seng jong ngi,”la ong u Sanki Shylla.

Nalor kata ka shnong Ïongnoh ka don ïaki nongthañ khoh nong than shang bad ki nongshna ïaki tiar tem tynrai bad u ngeit ba kane kan ïarap ïa kine ruh. Namar da kaba kiew ka kam jngohkai pyrthei haka shnong kine ruh kin ïohnong da kaba die ïakine ki tiar kiba ki shna hi da ki kti. Ka jingkyrmen ka long ba ka shnong kan myntoi ba kin mih bun ki dukan sha dukam bam bad kumjuh ruh ki briew ban die khaw die syiar ne ai wai tiar naka bynta ba ki nongwan bam khana kin ïoh pyndonkam.