Ka resol na ka sngi ba ar jong ka State Level Subroto Mukherjee Cup

Syllad | The Rising MeghalayaJuly 25, 2023

Ka sngi kaba ar jong ka lympung ialehkai phutbol State Level Subroto Mukherjee Cup Football Tournament kaba pyniaid da ka Directorate of Sports & Youth Affairs ka sorkar jylla, kala iaid shakhmat haka kyrdan U-14 bad U-17 kynthei bad shynrang kaba pynlong haki lai tylli ki madan kata ka MFA Turf Third Ground, Polo, Madan Heh Stadium bad ha SAI, STC, NEHU.

Haba phai sha ki resol jong ki jingialehkai kiba la long haka sngi ba ar, ha ka U-14 jong ki khynnah shynrang, ka jingiakhun hapdeng ka Ri Bhoi Mynkem Hr Sec School bad ka Umphyrnai Presbyterian Sec School na East Khasi Hlls ka la kut noh ha ka jingiakhaid kaba long da mar saw kol, ha kaba u nam tam ha kane ka jingiakhun dei u Ricky Kharkongor ka Umphyrnai Presbyterian Sec School, uba la ioh ban thep ia kine ki saw tylli ki kol ha ka minit kaba 4′, 17′, 19′, 20′.

Katba ka kynhun ialehkai jong ka Bamil L.P School Mangsang na East Garo Hills ka la lah ba kan pynliem noh da  3-0 ia ka Dabit Ampangdam S.S.A School na South Garo Hills, ka Monfort Hr Sec School ka la lah ba kan pynliem noh da 4-1 ia ka St. John Sec School na West Garo Hills, ka K.B Memorial Sec School, East Jaintia Hills District ka la lah ba kan pynliem noh ia ka Rongsang A.Bagre Sec School na South West Garo Hills da 6-0.

Haba phai sha ka resol na ka jingiakhun jong ka U-17 ki shynrang, ka Okkapara Sec School South West Garo Hills ka la lah ba kan pynliem noh ia ka Rangthong Christian Hr. Sec School South West Khasi Hills da 2-0, ka Mairang Presbyterian Hr Sec School ka Eastern West Khasi Hills ka la lah ba kan pynliem noh ia ka Nilwagre Sec School South Garo Hills da  3-0.

Katba ka shi kol kaba la thep da u Gideon Mukhim ha ka minit kaba 10′, ka la biang pura ia ka North Liberty Higher Secondary School, West jaintia Hills ban jop ia ka Rongrengre Govt Hr Sec School East Garo Hills. Katba ka Bekanang Sec School North Garo Hills ka la lah ba kan pynliem da 3-0 ia ka Dobasipara Sec School West Garo Hills.

Haka jingiakhun U-17 ki khynnah kynthei, Little Stars English Medium Sec School Eastern West Khasi Hills ka la lah ba kan pynliem da 4-1 ia ka Birin Nuchong Sec School South West Garo Hills, ka Telekali SSA U.P School South Garo Hills ka la lah ba kan pynliem  ia ka Chachat UP School Rongjeng East Garo Hills da 3-1,  katba ki thei ialehkai ka Rangthong Christian Hr Sec School South West Khasi Hills  ki la lah ban pynliem ia ka Monfort Dilni Bolchugre School West Garo Hills da 4-1, katba ki thei ialehkai ka Khliehriat Hr Sec School East Jaintia Hills District ki la lah ban pynliem da 6-0 ia ka Rongrong UP School North Garo Hills.