Subroto Mukherjee Cup: Ka North Liberty Higher Secondary School bad ka Dominic English School ki lahduh na West Jaintia Hills

Syllad | The Rising MeghalayaJune 24, 2024

Ka North Liberty Higher Secondary School, Jowai bad ka Dominic English School, Namdong ki dei ki ar tylli ki skul kiba la ioh ban rah iaka nam lahduh haka District Level Subroto Mukherjee Cup kaba pyniaid da ka ophis u District Sports Officer, West Jaintia Hills.

Baroh lai tylli ki final la pynlong haka 24 tarik Jylliew ha madan Kiang Nangbah Stadium.

Ki rang bad ki thei ialehkai ka North Liberty HS School ka la iohrah iaka nam lahduh haka kyrdan jong ka Under-17 Boys’ bad Girls’ bad ka Dominic English Upper Primary Schoolhaka Under-15 Boys’

Haba phai sha ka jingiakhun final, ki thei ialehkai ka North Liberty HS School ki la lah ha kaban pynliem ïaka Kiang Nangbah Govt. HS School da 7-0.

Ia kine ki 7 kol la thep Deigratia Dan kaba la khyrwit da ka Hat trick haka minit kaba 9, 45 bad 54, ka Peacefuly Pohplet kaba la thep haka minit kaba 16 bad 25, ka Alisha Pyrtuh bad ka Eiladki Ksoo kiba la thep mar shikol haka minit kaba 48 bad 56.

Na kaliang ki shynrang ka North Liberty HS School ka la pynliem iaka Govt Boys HS School da 2-0. Ia kine ki artylli ki goal jong ka North Liberty HS School la thep da u J. Nial Rasmut haka minit kaba 8 bad u Rio Marboh haka minit kaba 39.

Haka kyrdan Under-15 Boys, ka Dominic English Upper Primary School, Namdong-A kala pynliem iaka St. Dominic HS School, Mowkyndeng da 1-0. Ia kane ka shi goal jong ka Dominic English Upper Primary School, Namdong-A la thep da u Aibor Wahlang haka minit kaba 7.

Kumta da kane ka nam jop kine ki artylli ki skul kin mihkhmat iaka District sha ka State Level Football Tournament ka ban sa pynlong shen da ka tnad Directorate of Sports & Youth Affairs.

Iaki khusnam haka jingdonlang la sam da u MLA Jowai Bah Wailadmiki Shylla uba long kum u kongsan haka jingiadonlang u District Sports Officer Bah Khroobok Passah, u Working president ka West Jaintia District Sports Association Bah EMH Passah, Vice Persident WJDSA Bah Patrick Lamare, Working President East Jaintia Hills District Football Association Bah James Sutnga, u General Secretary Saipung Block Sports Association Bah Rimi Shadap nalor ki principal, ki nonghikai bad kiwei kiwei kiba shah khot sngewbha.