Ka North East Adventist University kaba nyngkong ban sdang iaka Waste Recovery Centre ban pynneh ia ka khuid ka suba

Syllad | The Rising MeghalayaMay 20, 2024

Ka North East Adventist University, Khliehtyrchi lyngba ka jingkyrshan jong ka Meghalaya State Pollution Control Board (MSPCB) ka la jam sha ka lynti ban tehlakam ia ki jaboh jabain bad ki niut ki nier hapoh ka institute lyngba ka jingplie ia ka Waste Recovery Centre (WRC) ka jong ka.

Ia kane ka WRC ia kaba la tip ruh kum ka Material Recovery Facility (MRF), la wan plie da u Dr. GH Chyrmang, MFS, Member Secretary ka MSPCB kum u Kongsan ha ka jingialang kaba long haka 17 tarik Jymmang.

Ha ka jingkren u Kongsan u la pyrto ia ka university halor ka jingshim ia kane ka sienjam kaba shlur ban sdang ban tehlakam ia ki niut ki nier na kane ka jaka.U la ong ruh, “Ka jingjaboh ka dei ka jingeh jong ka pyrthei hi baroh kawei, bad ka Board ka sngewkmen shibun ban aijingkyrshan ia ka university ha ka jingpyrshang ka jong ka ban tehlakam ia kane ka jingjaboh kaba mih na kane ka jaka pule. Namar ba ka long kaba shem shitom ia ka sorkar ba kan pynioh jaka theh niut, ka WRC ka dei ka sienjam kaba biang tam ha kaba la pyniakhlad noh ia ki niut ki nier kiba pyut bad ki bym pyut bad ia kiba lah ban pyndonkam biang lane ban recycle.

Nalor kata u la pynpaw ruh ia ka jingkyrshan jong ka Board da kaba kyrpad ia ki 13 tylli ki cement plant kiba don ha East Jaintia Hills ba kin pyndonkam da ka Refuse-Derived Fuel (RDF) ba la pynmih lyngba ki jaboh jabain ia kiba ym lah ban pyndonkam biang ne recycle.

Lah ban kdew ba ka North East Adventist University, Khliehtyrchi ha ryngkat ka jingiatreilang bad ka Society for Urban and Rural Empowerment (SURE) kaba don ha Jowai, bad ba la kyrshan da ka Swachh Bharat Mission Urban, ka la pynlong ia ka awareness program halor ka jingdonkam ban pynlong ia ka campud ka university kaba khuid ba suba.

Hapoh ka jingialam jong u Bah Wompher Shadap, Capacity Building Specialist hapoh SBM Urban, PMU, Urban Affairs Department la pynlong ia ka awareness program bad bud da ka jingpyni ha kaba iadei bad ki jaboh jabain bad ki niut ki nier lyngba ka kynhun ka SBM Urban hapoh ka campud jong ka university.

Mynta ki bor pyniaid ka university ki la poi sha kawei pat ka bynta ha ka jingiaid lynti, kata ban sdang ia ka community waste management program hapoh ka university. Kane kan dei ruh ka project kaba nyngkong eh ha ka Jylla, kata ia kaba ka MSPCB ka la pynpaw ia ka jinglong la kloi ban aijingkyrshan.

Na ka liang u Member Secretary u la aiti ruh ia ki laitylli ki jaka bret niut sha ki unit bapher bapher jong ka university. Hadien na ka liang u Dr. Chyrmang u la buh ia u mawnongrim na ka bynta ka WRC ia kaba yn tei lyngba ka jingkyrshan pisa jong ka MSPCB.

Hadien la pynlong ruh ia ka jingpynshai paidbah halor ka waste management ha ka session kaba ar jong ka prokram.

Haba kren kum u resource person u Dr HH Mohrmen u la ong, “Ka don ruh ia ka jingthmu ba kane ka project kan dei ka pilot test bad kyrmen ba ki jingtip lyngba kane ka project kan iarap na ka bynta ban pyniar sha kiwei pat ki jaka kumjuh.”

Kiwei pat kiba la aijingkren ha kane ka jingialang ki kynthup ia u Bah RV Syngkon, Beinonai Phiapi, Dr. Andrew Zimik, Registrar, Sandrew Syiem, Environmental Engineer, MSPCB, Dr. Jemima Marak bad u  Dr. Paul Bhaggien, Vice-Chancellor, NEAU.