Ka Nartiang Constituency ka sah dien ha ka roi ka par, ka pule puthi, ka koit ka khiah bad ka ioh ka kot ong u MDC thymmai ka Mynsngat Khanduli

Syllad | The Rising MeghalayaMarch 22, 2019

JOWAI: U MDC jong ka Mynsngat Khanduli Constituency u Ma Dawan Lyngdoh u la ong ba ka Nartiang constituency ka dei kawei na pdeng ki constituency kaba sah dien tam hapoh ka jylla ha kaba ia dei bad ka roi ka par, ka pule puthi, ka rep ka riang, ka koit ka khiah, ki jaka kynshew pisa (bank) bad kiwei kiwei.

Une MDC u la ong ba ka pule puthi ka long kaba kordor tam ha kane ka juk mynta, hynrei haba ianujor ïa kane ka thain bad kiwei pat kiba don hapoh ka jylla kam iahap shuh khamtam naduh Mynsngat Khanduli kim don ki jaka pule kaba biang katkum kane ka juk lait noh ki skul private hynrei haba phai sha ka juk stad mynta kine ki jaka kim lah ban ai ka jinghikai kaba biang ia ki samla jong kane ka thain.

Ula ong ba bun ki khynnah samla kim ioh lad ban pyndep ia ki jingpule jong ki namar ba katei ka thain kam don centre iakhun eksamin. Ban ïakhun eksam selection bad matrik jong ki, ki hap ban mih na shnong ban leit thoh shaduh Ummulong kaba jngai haduh 40-50 Km na ka shnong jong ki, kane ka jing jngai ka la pynlong ia shibun ki samla ban sangeh ban bteng ïaka jingpule jong ki, ha ka juh ka por na ka daw ka jingduh jingkyrduh kim ioh lad shuh ban leit pyndep ia ki jingpule tang na ka daw ka jingjngai.

Ha kaba iadei bad ka koit ka khiah, ka thain Namdong Khanduli ka la shah ieh khunswet haduh katta katta namar shibun ki nongpang ki ba dei ban sumar hapoh Namdong PHC ki la hap ban leit sha duh Nartiang PHC, Jowai lane Shillong tang na ka daw ka jingbym don ki doctor man ka sngi bad ka jingduna dawai bad ki nurse hapoh kane ka PHC.

Ka Namdong PHC kaba la dei ban kyntiew kyrdan sha ka CHC naduh u snem 2012 bad ia ka Khanduli sub centre sha ka PHC hynrei kaba sngewsih ban iohi haduh mynta u snem khlem lah ban leh eiei. Halor kane ki nongshong shnong jong kane ka thain ki la mad shibun ki jingeh ha ka pang ka shitom hynrei ym don nongiarap ban pynsuk ia kane ka jingeh u paidbah. Ka jingjngai jong ki shnong na kawei ka sub centre sha kawei pat kam iahap shuh katkum ka jingbun briew (population) bun ki jaka kiba la don ar shah ia kaba dei ban don kum ka Namdong Sub Centre kat kum ki kyndon jong ka health department ka jingbun briew ha kawei ka sub centre ym dei ban palat ia ak 3,000 lai hajar ngut hynrei kumba ka long ha Namdong mynta ka la don palat 7,000 (Hynniew hajar ngut) kum juh ka Sanaro Sub Centre, Khanduli Sub Centre bad kiwei kiwei ki sub centre kiba don ha kane ka PHC ki long kum juh. Kane ka la pynlong ia ki nong shong shnong ban duh ei shibun ki mynsiem ba kordor tang na ka daw ka jingbymbiang ki jaka sumar katkum ba ki dei ban don.

Ha kaba ia dei bad ka C&RD Block kaba la mut ban plie naduh u snem 2014-15 ha ka shnong Namdong ha kaba wat ia ka jaka la dep ai sngewbha sha ka department ban pynsuk ia ki briew kane ka thain, hynrei haduh kane ka por kam pat urlong satia wat lada ki paidbah ki la dei ban ioh ruh haba ia nujor katkum ka jingjngai bad ka jingbunbriew kane ka thain.

Une u MDC thymmai ula ong ba ka shong hok ban ioh ia ka C&RD Block ha Namdong namar tang na ka daw ka jingjngai jong kane ka C&RD Block ki paidbah bun sien ki la duh ei ia ki jingmyntoi kiba ki dei hok ban ioh khamtam ia ki nongrep namar ki la hap ban pynlut por da ki sngi ban leit khamtam naduh Lapangap Khanduli ki la hap ban leit da ki 100Km ban poi sha Block kaba don ha Thadlaskein, kane ka ka jingjngai bad ka jingbun briew ha kane ka C&RD Block kala pynshitom ia ki paidbah nongkyndong jong kane ka thain ha kaba ia dei bad ki jingmyntoi kiba ki dei ban ioh ha ki bynta bapher bapher.

Ha kaba ia dei bad ka bank ka shnong Namdong kaba kynthup naduh Mynsngat shaduh Sanaro ka la dei ban don ki bank hapoh kine ki jaka khnang ban pynsuk ia ki paidbah jong kane ka thain ha kaban jingkynshew ia ka pisa tyngka khamtam ha kane ka juk mynta kaba la donkam Ia u wei pa u wei ban don ia ka bank passbook na ka bynta ki jingdonkam jong u hynrei kine baroh ki la sahkut tang ha ki jingiakren khlem da poi shano shano kane ka la pynduh nong ia ki paidbah jong kane ka thain jong ngi.

Une u MDC ba dang shah jied thymmai ula pynpaw ka jingbynniaw halor kane ka jingsah dien ka thain bad ula khot ula wer ïaki paidbah ban iatreilang khnang ban wan ka roi ka par ha katei ka thain.