Ka MRSSA ka long kawei na ki aiñ kaba kynsai tam ha ka pyrthei, sangeh ka leh politik, ong u Mukul ïa ka sorkar

Syllad | The Rising MeghalayaFebruary 19, 2024

U Myntri Rangbah barim ka jylla u Mukul Sangma 19 tarik Rymphang, u la kyntu ïa ka sorkar MDA ba kan sangeh shisyndon ban leh politik bad aiñ Meghalaya Residents Safety and Security Act (MRSSA).

 U Sangma u la ong ba ka MRSSA ka long kawei na ki aiñ ba kynsai tam ha ka pyrthei ba ïadei bad ka jingtem halor ka wanrung ruh ki mynder ri bad rung beaiñ ki nongphet wir. Ka dei ka aiñ kaba la mynjur da kawei ka sur khlem don mano mano ba pyrshah ha ka dorbar thaw aiñ ka sorkar jylla ryngkat ka jingdon bynta lang kiba don bynta ha ki por ba la dep.

“Ki don bun ki ri ba kynthup ka United States of America, United Kingdom ki dei kiba lah pynshang ban wad ki lad ki lynti ban tem ka jingdon ki wan poi wir beaiñ namar kim shim don satia kum kane ka aiñ. Nga kwah ban kyntu ïa baroh kynthup ka sorkar kaba mynta ba kin sngewbha ban shimkhia lang halor kane ka aiñ kaba kongsan ban pyntreikam na ka bynta ka jingiat jingbha jong ka jylla hi baroh kawei. To ngin sangeh noh ban leh politik halor kane ka mat”.

Na ka liang une u Myntri Rangbah barim u la kynnoh ba ïa kane ka aiñ la pynsangeh treikam naduh u snem 2018 namar ba ngi leh politik bad kane ka aiñ da kaba lehklet iaka jingmyntoi u paidbah.

 “Kumta nga kyrpad ban khmih biang halor kane ka bynta. To ngin ïabuh ha ka jingmut ban pyntrei ki kam kiba ai jingmyntoi lang ïa u paidbah ym satia ïa ka sorkar kaba synshar mynshuwa. Nga kyrpad ba phin shimkhia lang halor ka jingpyntreikam ïa kane ka aiñ wat hapdeng ka jingkhim ka por shong dorbar. Nga dei u ba wanrah ïa kane ka aiñ ryngkat ka jingai jingmut jong baroh kiba donbynta. Kumta ngim dei ban long khim mynsiem halor ka thong jong ka jingtreishitom jongngi kaba lah shim por na ka bynta jongngi iwei pa iwei.”

 Une u Myntri Rangbah barim u la maham ruh ïa ka jylla ba ka bamsap ka dei kaba kham shyrkhei bad kham jur ka jingma ban ïa ki kam pyntriem kaba lah ban wallam tang ka jingtroiñ ha ka lawei.

Halor ka jingtih dewïong beaiñ, u la kylli ba hato ka sorkar jylla ka shlur ban thaw da ka kynhun tohkit laitluid bad ong ba kum kine ki kam beaiñ kin ym lah satia ban urlong khlem ka jingtip ki briew ki ba don ha ka bor 

“Bunsien nga ju pyrshang wanrah iaki kine ki mat haka sorkar halor kine ki kam beaiñ kaba ktah na ka por sha ka por halor ka ïoh ka kot jong ka jylla. Kano Kano ka ri kaba hiar bad randien ka dei namar ka bamsap, bad bun kiwei de ki kam beaiñ bad kynthup ka jingshalan beaiñ ki mar ki mata kynthup ruh u drok,” la ong u Sangma.

U la kdew  ba ka jingïoh laitlan halor ka jingshalan drok ka pynkylla langkñia ïa ki samla halor ki kam drok. “Ka long kaba donkam na ka bynta ka sorkar kynthup ka sorkar pdeng bad kiwei de ki ri ban shimkhia namar kane kam dei satia tang ka dawbah ha ka jylla Meghalaya. Dei halor kane, donkam ban pdiang bad baroh ki tip ba ka dei ka daw kaba ktah na shiliang sha shiliang pud. Kumta ngi donkam ban pynleit jingmut thikna ban shimkhia halor kane ka mat.”