Ka liang pyrshah ka mihkhmat ia ka sur u paidbah halor ka MSIPF: Mukul

Syllad | The Rising MeghalayaMarch 13, 2025

U Nongialam ka Liang Pyrshah u Mukul Sangma ha ka 12 tarik Lber u la kyrpad ia ka sorkar jylla ba kan kiar na kaba banbor halor ki mat kiba iaid pyrshah ia u paidbah hadien ka jingpyrshah kaba jur halor ka jingthmu ban mynjur ia ki jingpynkylla (amendment) ha ka Meghalaya State Investment Promotion and Facilitation Act ha kane ka dorbar mang tyngka jong ka Iingdorbar.

Haba kren sha ki lad pathai khubor, u Mukul u la ong ba ki sorkar kiba bud ha ki snem kiba la leit noh kim ju banbor hynrei ki la pynpaw lyngba ki kam ki jong ki.

“Kumta ruh ngi khmih lynti ba kane ka sorkar ba mynta kan pyni ia kajuh ka jingsngew bad ban iasam lang ia ka jingsngewkhia bad ym ban pyrshang jubor ne leh donbor ia ki mat kiba iaid pyrshah ia u paidbah,” u la ong.

Haba kylli hato ki liang pyrshah kin khanglad ia ka sorkar ba kan mynjur ia ka amendment bill, u Mukul u la ong, “Ngin mihkhmat ia ka sur jong ki briew ki jong ngi hi na kylleng ka jylla. Ngi dei ban pynpaw ia ka ha ka rukom kaba dei bad ngi khmih lynti ba ka sorkar kan long kaba sngewthuh ia ki jingsngewkhia namar ha kata ka rukom ka mynsiem jong ka synshar paidbah baroh kawei ka treikam.”

Lah ban kdew ba ha ka 11 tarik Lber ka KSU ka la pynlong da ka jingiaid paidbah shapoh ka Iingdorbar ban dawa na ka sorkar jlla ba ka dei ban pynduh pyndam noh mardor ia ka MSIPF.

U Mukul u la ban jur ruh halor ka jingdonkam ia ka sorkar ba kan thaw ia ka jinglong jingman kaba tei ha kaba ki briew kin sngewthuh ia ki jingmyntoi jong ki kam bei tyngka bad ym ban don ia kata ka jingbym shngain.