Ka khubor ba sngewtynnad: Lap biang ia u khynnah ba jah na Bengaluru sha Tamil Nadu

Syllad | The Rising MeghalayaApril 26, 2025

Ka Jylla kala ioh iaka khubor kaba sngewkmen hadien bala lap biang u khynnah uba la jah lynti hapdeng ka met kaba koit kaba khiah.

Une u khynnah uba jah lynti u dei u Welcome Rasmut (16 snem) uba na ka shnong Ummulong, West Jaintia Hills bad ula jah na ka jaka kaba u sah haka 12 tarik Iaiong 2025 na Kammanahalli, Bengaluru, Karnataka.

La lap biang ia u na Tamil Nadu haka janmiet 16 tarik iaiong 2025 da uwei u Pastor bad ki paralok jong i kiba la iarap ban leit buh ia u hapoh ka jingpeit jong ka Child Welfare Committee (CWC) Krishnagiri, Tamilnadu, bad ia une u heprit Welcome Rasmut la aiti noh sha ki bahaing jong u ha Bengaluru ha ka 25 tarik Iaiong 2025.

Ka jingjah kynsan jong u Welcome ka la pynlong ia kiba ha iing ha sem bad ki paralok jong u ban sngewkhia bad shongsyier mynsiem. La iohi khatduh ia u ha ka step jong ka 12 tarik Iaiong, hadien ba u la mih na iing sah jong u ban iaid kai mynstep, hynrei la suba ba u la jah lynti. Hadien ba kim shym la lah ban lap ia u, ki bahaiing jong u ki la pyntip mar mar sha ki pulit, bad ki khubor shaphang ka jingjah jong u ki la saphriang lyngba ki kot khubor jong ka thain bad ki lad pathai khubor.

Lyngba ka jingiatreilang jong ki seng bad ki riewshimet, la ioh khubor ba u khynnah u la poi sha Tamil Nadu. U wei u pastor uba shem ia u, u la shimkhia bad u la pynpoi ia u sha ka ka jaka ai jingsumar iaki khynnah ka Children Welfare Committee (CWC) ka Krishnagiri Tamil Nadu, kaba la peit bad sumar bha ia u haduh ba la ioh biang ban iakynduh ba kiba ha iing jong u.

U Donboklang Nongphud president KSU Bengaluru Unit ha u kyrwoh ula ong ba ka jingjop ban lap biang ia u Welcome Rasmut ka long ruh ka sakhi jong ka jingtrei shitom, jingïatreilang jong baroh ban wad ia une u khynnah haduh ban da shem. Kine ki kynthup ia Sir Iada Martin Marbaniang, Pastor AS Nongrum jong ka KJCF Bangalore, ki paralok ba iasah marjan, ka NPP Ummulong Youth Wing. Ka CWC Jowai, ki pulit na Banaswadi Police Station, ryngkat ki ba ha ïing ha sem, kiba la shim khia ban pynsaphriang iaka khubor wad jingtip bad ban wad jingïarap.

Ka jingai jingkyrshan na kine ki kynhun bad riew paidbah ka la pyni ba ka jingïatylli bad ka jingïarap para briew ka long kaba donkam tam ha ka synshar paidbah bad ha ka jingïada ia ki khynnah.

Ki ba haiing jong u Welcome Rasmut kim lah khlem da pynpaw iaka jingsngewnguh ia baroh kiba la noh synniang, kiba la kynmaw lem haki jingduwai bad kiba la kyrshan lem hakum kane ka por ba ki iakynduh iaki jingeh.