Ka khubor ba shai ki samla pule NEHU bad Nonghikai: Yn ym pdiang ia ka jingwanphai u VC

Syllad | The Rising MeghalayaNovember 25, 2024

Ki Samla pule bad ki Nonghikai ka Skulbah North Eastern Hill University (NEHU) ki la iakynduh ia ki arngut ki dkhot ka Inquiry Committee (IC) ba la thung da ka Ministry of Education bad pynpaw ia ka khubor kaba shai khlem da khein ia ka jingmih na ka jingtohkit ba kin ym lah ban pdiang ia ka jingwanphai u Prof PS Shukla kum u Vice Chancellor ka University.

Ki samla pule kiba pynlong ia ka jingiakhih hapoh ka jingialam ka North Eastern Hill University Students’ Union (NEHUSU) ba la kyrshan ka Khasi Students’ Union (KSU-NEHU Unit), ki nonghikai hapoh ka shatri jong ka North Eastern Hill University Teachers’ Association (NEHUTA) lem bad kiwei pat kiba ia don bynta ki la aiti da ka jingthoh sha ka Committee kiba pynlong ka jingtohkit halor ki jingkynnoh pyrshah ia u VC nalor ki jingkynnoh leh bym hok bad ki jingbym lah pyniaid ia ki kam hapoh ka skulbah.

Haba kren sha ki lad pathai khubor, u president ka NEHUSU u Sandy Sohtun su la ong “Ngi la iamir jingmut bad ai ruh da ka jingthoh halor kaei kaba u VC u la leh ha kine ki lai snem bad wat ia ki memorandum kiba ngi la thoh naduh u snem 2022 haduh 2024 ngi la dep ai sha ka sorkar.Ngi la pyni ia ki kot ki sla ha kaba u VC um shym la khein snep ia baroh hapoh kane ka University.

“Ngi la phah ia ka khubor kaba shai ba watla ka jingmih na kane ka Committee kan long kumno kumno ruh hynrei ngin ym ailad ne pdiang ia u VC ba un wan rung ha kane ka skulbah sa shisien pat,” u la ong.

Da kaba shaniah skhem ba ka Committee kan aijingmut ia ki sienjam kiba dei pyrshah ia u VC, u samla Sandy Sohtun u la ong, “Ngi sngewhun ia ka jingmih na ka jingialang bad ngi la wanrah ia ki kot ki sla kiba pyni ia ki kam leh donbor bad bym kheinsnep jong u VC pyrshah ia kiwei pat ki bor pyniaid jong ka skulabh.

U la ong ruh ba ki samla pule watla katta kin dang hap ban iakren halor kiwei pat ki sienjam bad shen kin sa shim ia ka rai ha ka jingialang ka ban long hapdeng ka NEHUSU bad ka KSU NEHU Unit.

“Kumba ka long mynta ka jingiakhih kan iaid shakhmat ha kaba yn ym sdang ia ka jingshim klas,” u la ong.

Ki samla pule kiba pynsangeh noh shipor ia ka jingshah thngan ba khlem pud jong ki hadien ka jingshah ktah jur ha ka liang ka koit ka khiah.

Haba shim ia ka jingialang kum kaba seisoh, u president ka NEHUTA u Prof Lakhon Kma u la ong, “Ngi la kren ia kaei kaba ngi don ban ong. Kam don kaei kaei ban buhrieh. Kino kino ki mat kiba ngi la rah haduh mynta na ka liang ka NEHUTA bad ki mat kiba la pynpaw da ki samla pule ngi la ban jur ba kano kano ka jingleh bakla kaba u VC u la leh hapoh ka University naduh ba u la wan shimti, kata la ka long ha ka jingpynrung kam, la ka long ban kyntait iano iano halor ka hok jong ki ban long Dean – baroh kiba la lam sha kane ka jinglong jingman kaba mynta ha kaba ngi baroh ngi la dawa ban weng noh ia u -Nga tharai ngi la dep pynpaw bad nga tharai ba ka association ka la kren shai ba khlem da khein ia kano kano ka jingmih na kane ka jingtohkit ngin ym lah satia ban dang pdiang ia ka jingwanphai jong u VC, kata ym tang namar ba ka NEHUTA, NEHUNSA lane ka NEHUSU ki la pynbna ba kim lah ban pdiang, hynrei wat na ka liang ka Mawlai Town Dorbar ruh ka la khang pyrshah ia ka jingwan iuhkjat ka jong u ha ka shnong Mawlai.”