Ka Jylla ka kham donkam ia ki ba lah weng ia ki jingeh ban ia kiba heh tyngam: Jemino

Syllad | The Rising MeghalayaApril 9, 2024

U General Secretary ka Seng United Democratic Party (UDP) u Bah Jemino Mawthoh  haba siat pharshi pyrshah ia ka Seng Voice of the People Party (VPP) haka 8 tarik Iaiong u la ong ba ka Jylla ka kham donkam ia ki ban lah ban weng ia ki jingeh ha ka jaka jong kiba shu heh tang ka tyngam ne sur.

“Ngi dei ka jaidbynriew kaba rit ha ryngkat kiba bun bah ki jait jingpang. Hynrei, ngi don tang ia ki briew kiba pyrta ba ki ieit jaidbynriew. Hooid, ngi donkam ban pynsawa ia ki sur hynrei ngi kham donkam ia kiba lah ban weng ia ki jingeh,” ong u Bah Mawthoh haba kren ha ka jingpang ialap ilekshon na ka bynta u kyrtong ka kynhun  Regional Democratic Alliance (RDA), u Bah Robertjune Kharjahrin ha Iawmusiang, Jowai.

U la ong ruh, “Ngi don shibun bah ki nongialam ha Meghalaya hynrei katno ngut na ki kiba lah ban khmih na ka bynta ka jingiaid beit jong ka Jylla.

Haba kren halor ki mat bapher bapher kaba kynthup ia ka reservation policy, u Bah Jemino u la ong, “Ngi la trei shitom ha kaba iadei bad ka jingiakhun halor ka reservation policy. Ki la don ki jingiakhih ha kaba iadei bad ka reservation policy, hynrei Ngam ong ha phi, ngi la ia shong haduh 14 tylli ki jingialang bad ki riew shemphang ban pan jingmut na ki halor kane ka mat. Ngi sngewkhia jur ruh halor ka mat kaba iadei bad ka CAA, UCC, ki kam iakajipud pud, ka jingshyrkhei jong u drok bad halor ka pule puthi.”

Da kaba ther tyngeh ia kito kiba kynthoh ia ka UDP bad HSPDP, u la ong, “Phim lah ban ong ba ka UDP bad ka HSPDP ki long ki bym larkam namar ki dei ki Seng Riewlum kiba la rim tam.

U la ong ruh ba ka RDA kan iai bteng ban pyrshang ban pyniatylli lang kawei ia ki party seng Riewlum bad ia ki paidbah jong ka thain Rilum Khasi bad Jaintia. “Ka jingphohsniew ka jong Nga ka long ban don tang kawei ka kynhun seng riewlum kaba iatylli hapoh Meghalaya,” u la bynrap.

Da kaba pynpaw ba ki don ki party sain hima kiba pyrshang ban pyntroin ia ka UDP bad ka HSPDP, u Bah Mawthoh u la ong, “Ki la pynmih ia ki jingkynthoh ba bunjait bad ngi dei ka bynta jong kane ka sorkar.Ha u snem 2013, ka UDP ka la jop 8 seat hapoh ka jingialam jong u  Dr Donkupar Roy. Nga kynmaw bad u Dr Donkupar u la kylli ia Nga la u kwah ha ka liang synshar ne liang pyrshah, kumta nga la ong ha u namar ba ngi la jop tang 8 seat, to ngin shong ha ka liang pyrshah bad ngi la don haduh san snem. Ha u 2018 namar ngi la len lade ha u snem 2013, ngi nang tharai ba na ki 8 tylli ki seat, ka jingkhlain kan kiew sha ka 24 haduh 30 seat, hynrei ngi la shah rem bad ngi ioh tang hynriew seat ha u 2018. Ha u 2023, na ka 6 ngi la kiew sha ka 12 seat hapoh ka jingialam jong u Bah Metbah Lyngdoh. Lymda don ki nong pynthud ngin jin da la ioh 20 seat, bad ngin da la don ha ka kynhun myntri bad hapoh ka iingdorbar thawain.”

Halor ka jingpyniasoh ia ka UDP bad ka BJP, u Baw Mawthoh u la ong, “Ka la don ruh kane ka  jingkynnoh ba ka UDP ka la iatreilang ryngkat bad ka BJP. Ngi la shah kynthoh ha ki social media. Hynrei peit kaei kaba la jia mynta, ka BJP ka la kyrshan ia ka NPP. Kane ka pynpaw shai ba ka UDP kam don jingiadei bad ka BJP. Lada ngi don jingiadei bad ka BJP, ka la dei ban aijingkyrshan na ka bynta jong ngi. Hynrei, ka BJP ka la leit bad ka NPP, kumta kumno ka BJP kan iatreilang bad ka UDP.”