Ka jingwan pyniasoh u Bah Shangpliang sha ka NPP kan nang pynkhlain shuh shuh ia ka party, ong u Conrad Sangma

Syllad | The Rising MeghalayaSeptember 13, 2023

U President ka National Peoples’ Party (NPP) uba dei ruh u Myntri Rangbah ka Jylla u Conrad Sangma hynne ka sngi Balang u la pdiang sngewbha ia ka jingwan pyniasoh jong u Bah HM Shangpliang MLA barim ka Mawsynran bad nongialam barim ka seng BJP sha kane ka kynhun da kaba ong ruh ba kane kan nang aibor bad pynkhlain shuh shuh ia ka party.

Ia kane ka jingialang pdiang burom ia u Bah Shalngpliang uba la iehnoh kam dang shen na ka seng Bharatiya Janata Party (BJP) la pynlong ha ophis treikam jong ka seng NPP ha Shillong ha ka jingiadon lang ki nongialam ka party kaba kynthup ia ki Symbud Myntri Rangbah ka jylla, kata u Bah Prestone Tynsong bad u Sniawbhalang Dhar nalor u CM barim ka jylla uba dei ruh u nongai buit sha ka sorkar u Dr. DD Lapang.

Haba kren ha ka jingialang u Myntri Rangbah ka Jylla ula ong ba ka NPP ka pdiang sngewbha ia une u MLA barim ka Mawsynram sha ka sem jong ka NPP. U la ong ruh ba kin ioh shibun ki jingmyntoi lyngba kane ka jingwan pyniasoh jong u Bah Shangpliang kum u nongialam kynthup ia baroh ki nongkyrshan jong u kiba wan pyniasoh lang sha ka kynhun, bad kane ka nang aibor bad pynkhlain shuh shuh ia ka party hi baroh kawei.

Nalor kata u CM u la pyrto ruh ia ka jingtbit jong u Bah Shangpliang kum u nongmihkhmat barim bad halor ki jingnoh synniang ki jong ki hapoh Assembly.

U Bah Shangpliang ula pyntip ruh ba haduh palat 3000 ngut ki dkhot ki la iehnoh kam na ka party barim bad pyniasoh sha ka NPP ha Mawsynram ha kane ka sngi ba Ar ba la lah.