Ka jingsangeh treikam ki ASHA kala wanrah jingthud ka rukom treikam ki shnong ong ma Andrew Shullai

Syllad | The Rising MeghalayaJune 23, 2021

U Ma Andrew Shullai, MDC jong ka Jowai Central uba la kner la ka kti jingiarap jong u sha ki nongtrei ASHA haka sngi Balang, ula ong ba ka jingsangeh treikam jong ki ASHA kala wanrah jingthud ha ki shnong ki thaw namar ba ki dei ki briew kiba hakhmat eh bad ki dei ruh ki bud lum jong ka tnad ka koit ka khiah ha kaba iadei bad kino kino ki kam ban lum jingtip bad ban pyniaid shakhmat ia kino kino ki kam ha kaba iadei bad jingkoit jingkhiah ki nongshong shnong ha kylleng.

Ia ka jingialang ai jingiarap u ma Andrew iaki ASHA la pynlong ha Chutwakhu Indoor Hall haka jingialang kaba pyniaid da u Waheh Shnong Chutwakhu, Jowai u ma Philanderwell Lyngdoh haka jingiadonlang u president Synjuk Waheh Shnong Jowai u ma Alan Niangti bad kiwei kiwei.

Ki don haduh 20 ngut ki ASHA kiba la ioh jingiarap bad kine baroh kidei kiba hap hapoh ka ka jingpeit ka Jowai Urban Health Centre (Health and Wellness Centre), Loomkyrwiang, Jowai.

U ma Andrew Shullai haba kren ula ai khublei kyrpang ïaki ASHA kiba wat hadpeng ka jingioh kaba rit, hynrei kila trei shitom bad mynta hadien bala wan lynsher ka khlam COVID-19 baroh kila sngewthuh iaka jingkordor ka jingtrei jong ki ASHA.

Ha kaba iadei bad ka jingiakhih sangeh trei khlem buh por ki nongtrei ASHA hapoh ka lama jong ka Meghalaya ASHA Workers’ Union ula kyntu iaka sorkar ban dawa pynbeit ia kane namar ba ka jingdawa ki ASHA ka dei kaba don nongrim.