Ka jingpyniasoh ia ka jingioh kurup pisa na Arunachal bad u Conrad Sangma ka bym don nongrim: NPP

Syllad | The Rising MeghalayaApril 6, 2024

Ka National People’s Party (NPP) kala kyntait jur ia ki jingkynnoh ba ka jingioh kurup ia ka pisa kaba 1 klur tyngka na ka kali kaba bud nadien ka kynhun ki kali (convoy) jong u Myntri Rangbah ka Jylla u Conrad Sangma hapoh ka jaka talasi ne check point ha Longding, Arunachal Pradesh ka don jingiadei bad une u National President ka party.

Ka Seng ka la ong ruh ba kano kano ka jingpyrshang ban pyniasoh ia kane  jingioh kurup pisa bad u Myntri Rangbah ka Jylla ka long ka bym don nongrim bad ka bym shongnia hangno hangno ruh.

Kum ban kdew ba ha ka sngi Palei ba la lah la ioh ban kurup ia ka pisa kaba haduh 1 klur na ka kali jong u heh ka Badri Rai company kaba bud nadien ka kynhun ki kali (convoy) jong u Myntri Rangbah ka Jylla u Conrad Sangma hapoh ka jaka talasi ha Longding, Arunachal Pradesh.

U Conrad u la don ha ka lynti na ka bynta ban leit sha ka jingialap ilekshon na ka bynta u kyrtong MLA  jong ka NPP ha Longding ka ban long ha ka 19 tarik mynta u bnai, kata kaba hap ha kajuh ka sngi ba pynlong ia ka Lok Sabha ilekshon.

 “Ngim don jingtip ei ei ha kaba iadei bad katei ka jingjia shah bat jong katei ka kali tad haduh ban da iohi lyngba ki lad pathai khubor.Ka party jong ngi ka kyndit shibun haba ka iohi ia kane ka khubor, bad kano kano ka jingthmu pyniasoh bad u National President ka NPP ka long ka bym don nongrim,” ong u nongaiktien ka NPP u Bah Himalaya M Shangpliang.

U la ong ruh ba kane ka kali kaba la shah bat noh hapoh ka jaka talasi bad kaba lam sha ka jingioh kurup ia katei ka pisa kam don bynta ei ei ruh bad kane ka kynhun jong ki kali ba don u president ka party, kata ia kaba la pynthikna ruh da u Superintendent of Police ka Longding.

Nalor kata u nongaiktien ula bynrap ruh da kaba ong, “Ki kali jong ngi kaba kynthup ia ka kali ba don u president ki la pyndep ia ka jingshah talasi katkum ki kyndon ba la pyntreikam katkum ka model code of conduct ha kaba kam shym la lap ei ei ruh.”

“Kumjuh ha ka por ba la pynlong ia ka jingtalasi ia ki kali ha Kanubari check gate da ki bor pahara FST, SST bad ki bor pulit, ki kali ka party jong ngi ki la shah talasi kata kynthup ia ka kali ba shong u president bad u general secretary ka party nalor ka kynhun kaba synran ia u president. Nalor kata ia ki kali pulit kiba synran ruh la talashi bha hynrei ym shym la lap ei ei ruh,” u la ong shuh shuh.