Ka jingpyniar tnat ka VPP ha Rilum Garo kan long ka jingtynjuh iaka NPP; ong u Rakkam

Syllad | The Rising MeghalayaOctober 16, 2024

U nongialam ka National People’s Party (NPP) uba dei ruh u Myntri Sorkar u Rakkam A Sangma ha ka 15 tarik Risaw u la ong ba ka jingpyniar tnad jong ka Voice of the People Party (VPP) sha Rilum Garo kan long ka jingtynjuh iaka seng NPP.

Haba kren sha ki lad pathai khubor, u Rakkam u la ong, “Man la ki seng sain pyrthei la thaw kyrpang da ka jingthmu ha ryngkat ki mat ba kyrpang. Hooid, la ong da kiba bun ba kam long kaba dei ban shu kut tang ha kawei ka thain ne kawei ka kynhun jaidbynriew. Kumta ruh, Nga pyrkhat ba ki paralok jong ngi (VPP) ruh ka la sngewthuh ia ka jingitynnad jong ka Jylla. Namar kata ka jingkhih jingksar kaba ki la pynlong hadien ka elekshon MP ba dang shen ha Shillong ka la ai mynsiem bad ai bor ba kin poi sha ki paidbah jong ka thain Rilum Garo.”

U la ong, “Ka long kaba sngewtynnad bad kaba bha ba kin pyniar ia ki thapniang jong ki sha Rilum Garo, hooid ngi tip kum ki nongsynshar, kan long kaba buh jingeh na ka bynta jong ngi ka NPP ruh.”

U Rakkam u la kam ruh ba kiba bun ki nongialam na ka Seng Congress bad ka TMC ha Rilum Garo ki la don hapdeng ka jingiakren ban pyniasoh sha ka VPP.

“Lehse, ka long ba lada ki trei bha kan long shisha ka jingeh ia ngi kumjuh, bad ngi ruh ngi sngewthuh hynrei ngin sa rai lashai ha kaba iadei bad kane ka phang. Ka elekshon ka dei hi ka elekshon, ka politik ka dei hi ka politik, hynrei hooid ngi pdiang da kaba sngewbha ia kane ka jingpyniar tnad ka jong ki, ka jingiohi jong ki paidbah halor ki jingsngew iapher ruh kan jah noh, kumta kane ka long ka lynti kaba bha,” u la ong.

Haba kylli, u Rakkam u la ong, “Nga iai ong kham hashwa ha u snem 2012, ki briew ki ong ba ka NCP ka dei ka party Garo. Hato don ba ong mynta ia kata? Ym dei. Ka shong ha ki nongialam kumno ki trei bad ai mynsiem iaki paidbah. Haba ka VPP ruh kan hap ban pyni halor ka jingpyrkhat bakla jong ki briew bad ka jingsngew iapher. Ka long ka sienjam kaba bha bad ban leit sha Rilum Garo lem bad ka jingkitkhlieh, kan long shisha ka jingtynjuh ia ngi. To ngin sa ia peit ia ka lashai.”