Ka jingpyllait ia ka Jylla na ka CAA ka dei tang ka buit ilekshon jong ka BJP,ong u MDC Congress

Syllad | The Rising MeghalayaApril 5, 2024

Ka jingpyllait mynta ia ka Jylla Meghalaya na ka jingtreikam jong ka Citizenship Amendment Act (CAA) ka dei tang ka buit ilekshon jong ka seng BJP, ong u MDC ka Congress napoh Jowai North constituency u Bah Brighstar Chyrmang ha ka jingkren ialap ilekshon na ka bynta u kyrtong ka Seng Congress u Bah Vincent H Pala ha ka shnong Raliang, West Jaintia Hills hynne ka sngi Palei.

U la maham ruh ba lada ka BJP ka wan biang ha ka bor ha Delhi khlem pep kan pyntreikam noh ia ka CAA ha kane ka Jylla Meghalaya.

Nalor kata u la ong ruh ba ka jingbym pyllait ia ka bhah khajna na ki mar pohkhyndew da ka Sorkar Jylla sha ka JHADC ki nongtrei bad ki MDC jong ka JHADC kim shym la ioh tulop mynta la bun bun bnai.

Kumta u la kyntu ia ki paidbah ba ki dei ban ban jied biang u Bah Pala kum u MP  namar ba u long u MP ba la kham tbit kumta u lah ban ioh ia ka shuki Myntri hapoh ka sorkar Pdeng ha kane ka kynti lada ka Seng Congress ka wanphai ha ka bor.

Katba u Bah Emlang Laloo kyrtong Seng Congress na ka 1-Nartiang constituency ha ka eleshon MLA ba dang shu dep ha ka jingkren ula ong ba katkum ka jinglong jingman ka sain hima sima ha ka Ri India, mynta ki don tang ar kynhun, ka NDA kaba thmu pynduh pyndam ia ka Riti Synshar Ri ne Constitution bad ka synshar paidbah ne Democracy bad ka kynhun INDIA kaba iakhun ban pynneh pynsah ia ka Constitution bad Democracy.

Haba phai pat sha ka jinglong jingman ha jylla Meghalaya mynta, u Bah Laloo u la ong ba mynta tang ki Super Level ki kamai ki pahuh katba kita ki High Level bad ki Medium Level ki la duh kam duh jam.

U la ong ba lada ka Congress ka wan biang ha ka bor kan pyntreikam noh ia ka Minimum Support Price na bynta ki mar rep khnang ba ki nongrep kin ym jynjar bad u la ai nuksa ruh ba ka dor jong u synsar ka hiar bha mynta bad ki nongrep kiba thung synsar ki ud ki lyniar.

Katba u Chief Executive Member (CEM) barim ka JHADC u Bah Madonbai Rymbai u la ong ba yn ym lah satia ban pynkylla ia ka Reservation Policy namar ladep  iasoi soskular hapdeng ki nongialam mynshwa.

U President ka Mowkaiaw Block Congress Committee (MBCC) u Bah Rikut Parien ula ong ka kyrtong jong ka seng NPP ka Kong Ampareen Lyngdoh ka dei ka MLA barim jong ka Seng Congress bad ynda ka la heh ka la san ka la tbit kum ka MLA ka iehnoh ia ka Seng Congress bad mynta ka bein ka khoh kylla ia ka Seng Congress.

Haba pynkynmaw ia ki jingnoh synniang jong ka Seng Congress, u Bah Rikut u la ong ba ka Seng Congress ka la wanrah ia ka NEIGRIHMS ha Meghalaya, ka la pyntreikam ia ka bylla shispah sngi ne ka MGNREGS bad ia ka Smart Card ban sumar sukher haba pang ba shitom.

U la ong ruh ba ka khlam COVID-19 ka la long ka kabu ksiar ia ka Sorkar NPP ban bamsap da ki spah klur ha ka jingai daw ba ai jingiarap sha ki briew kiba duk bad sha ki nongrep hynrei kita ki jingiarap baroh ki khlem poi satia sha kiba dei hok ban ioh.

Shuh shuh u Bah Rikut u la ong ruh ba tang kita ki briew hapoh ka kynhun High Level kiba ioh ban tih bad shalan dewiong beain bad kane ka jingleh ka la wanrah ia ka jingduh nong kaba khraw ia ka pla tyngka jong ka Sorkar.

Kumta ruh u la maham tyngeh ia ki paidbah ba lada ki jied ia ka Seng NPP ha kane ka eleshon ka mut ba ki jied ia ka seng BJP.