Ka jingkynnoh buhrieh iaka pisa konsil kaba T.20 klur ka bym don nongrim, dawa panmap paidbah u CEM-JHADC ia u organising secretary ka VPP

Syllad | The Rising MeghalayaJuly 10, 2024

U Chief Executive Member jong ka Jaintia Hills Autonomous District Council (JHADC), Bah Thombor Shiwat ula ong ba ka jingkynnoh ba burieh iaka pisa ka konsil kaba T.20 klur da u organising secretary ka Voice of the People Party (VPP) u Damewanhi Rymbai ka long kaba bakla bad ka bym nongrim haei haei.

“Une u organising secretary ka VPP, uba la shu thad iaka burom ka ijot jong nga shimet bad ka konsil, u dei ban pan map paidbah hapoh shitaiew halor kane ka jingkynnoh kaba khlem nongrim jong u, lym kumta ngam banse ban iaid katkum ki lynti jong ka aiñ,” la ong u CEM JHADC bad bynrap ba kane ka pisa ka dei ka pisa jong ka konsil (Council Own Fund).

“Ha kum kane ka pyrthei shai mynta kaei kaba ngin burieh, haba ngi ioh pisa ngi la iathuh ba ka Sorkar kala pyllait bhah pisa bad u don hok aiu ban tuklar iaka jingtreikam jong ngi. U paidbah ula jied ia ngi ban ngin pyndep hok iaka kamram bad ban pyniaid iaki kam ki jam ka konsil kaba la bynshet ha ngi,” ong shuh shuh u CEM.

U CEM ula ban biang bad kubur ba ka konsil ka don haka khim ka khait bad kim shym la shong kli kti ban iasaid na ka bynta ban ioh pynmih iaka tulop ki nogtrei ka konsil. Ka pisa kaba ioh na ka sorkar ruh ka dei ka bhah ka konsil bad la mang ban siew ia ka tulop ki nongtrei da ki klur tang na ka bynta shibnai, kumta ka treasury ruh kan ym lah hi ban pyllait mynta mynta iaka pisa baroh, la ong u Bah Thombor bad ula kynthoh ia u ne u nongialam ka VPP ban kren ia kano kano ka kam dei ban pyrkhat rangbah bad ka rukom ban shu kren khlem ki sakhi ki satar bad pynjah burom ia kiwei kalong kaba bakla, ong shuh shuh u CEM Thombor.

Na kaliang ka secretary executive committee, JHADC, Kong B Bamon, kala ong ba baroh ki tip ba ka ka pla tyngka jong ka konsil ka hiran bad kano kano ka pisa kaba iohlum la pyniaid sha ka tulop.

Ka pisa kaba iohlum na ka sorkar jylla dangshen bad kumjuh ka T.20 klur kaba dei ka pisa ba iohlum ka konsil (Council Own Fund) kaba la kynnoh ba burieh u CEM da ka seng VPP ka long kaba bakla bad kam don satia kano kano ka jingpyndonkam bakla iaka pisa jong ka konsil, ong ka secretary executive committee JHADC.

Kala bynrap ruh ba naduh ophisar bad ki EC baroh kawei ki ia trei shitom miet bad sngi ban ialeh ban ioh iaka tulop. Haduh mynta la ar bnai la lah ban siew iaka tulop bad shen yn sa pyllait sa shibnai.