Ka jingkem ia ki dkhot ka KSU ka dei halor ki sakhi satar kiba khlain, ong u SP
U Superintendent of Police ka East Khasi Hills, u Rituraj Ravi haka 3 tarik Iaiong u la ong ba ka jingkem noh ia ki arngut ki dkhot jong ka Khasi Students’ Union (KSU) ha kaba iadei bad ka jingjia shah pyniap jong ki arngut ki bar Jylla ha Ichamati, Shella Block ka long halor ka nongrim jong ki sakhi satar kiba khlain.
Haba kren sha ki lad pathai khubor, u Ravi u la ong, “Ngi la pynlong ka jingtohkit halor kane ka jingjia shah pyniap kaba la jia naduh ka 27 tarik u Lber ba la dep katkum ki kyndon jong ka ain bad kane ka la long kaba seisoh katkum ki sakhi satar kiba ngi la ioh lum, kata lyngba ki jingiathuh da ki sakhi bad katkum ki jingioh lum lyngba baroh ki scientific data kiba ngi la ioh lum ha kaba iadei bad kane ka jingjia.”
Kine ki arngut ki dkhot ka KSU -South Khasi Hills kiba la shah kem noh ha ka miet sngi Nyngkong ba la lah ki dei kiba la tip kyrteng kum u Shanborlang Shati bad Mesadapbor Skhembill.
U SP u la ong ruh b ki paidbah kiba don kumba 300-400 ngut ki la ialum hapoh Sohra PS ban pynpaw pyrshah halor kane ka jingshah kem jong kine ki arngut, hynrei kane ka jingiakhih ka la long da ka lynti jong ka jingjaijai bad tang hadien katto katne por ki la ia mih noh na kane ka jaka, kata hadien ba ngi la pynshai ba ngi dang pynlong ka jingtohkit ia kine ki arngut bad ba ka ain kan leh hi ia kaba donkam.
Une u heh pulit u la ong ruh,”Halor kane ka jingjia, ngi kwah ban pynpaw ba ngi la iaid katkum ki sakhi satar kiba ngi la ioh lum ha ka por ba pynlong ia ka jingtohkit bad ia kane la pyntreikam katkum ki kyndon jong ka ain. Naduh katei ka sngi ba la jia ka jingshah pyniap ngi la pynlong ia ka jingtohkit na baroh ki liang.”
Shuh shuh u la ong ruh ba na ka liang ki bor pulit ki la long kiba peitngor bad pyrkhing ia ka jingpahara ha baroh kawei ka district, kata wat hadien ba u la kyntu ia ki samla ba kim dei ban shim ia ka ain ha la ki jong ki kti bad ban shah ia ka ain ba kan leh ia kaba donkam.
Hashuwa kane ki dkhot ka Khasi Students Union (KSU) kila la leit tur shapoh Sohra Police Station ban pan ka jingpynshai ha kaba iadei bad ka jingshah kem jong ki arngut ki dkhot jong ka ha kaba iadei bad ka jingjia shah pyniap ba dang shen jong ki arngut ki bar jylla hapoh Ichamati, Shella Block, East Khasi Hills.
Na ka liang ki paidbah na ki bynta bapher bapher jong ka thain Sohra ruh ki la wan ban pyniasoh ha kane ka jingleit tur jong ka seng hapoh ka jingialam u Assistant General Secretary ka KSU Central Body u Bah Rueben Najiar bad u president ka KSU-SKHD u Reebok Diengdoh.
Kine ki paidbah ki la ia pyrta bad pynrem jur halor katei ka jingshah kem jong kitei ki arngut ki dkhot ka seng ia kiba la tip kyrteng kum u Shanborlang Shati bad u Mesadapbor Skhembill bad dawa ban pyllait noh ia ki mardor.
Ha kane ka jingleit tur paidbah kaba la long ruh hapdeng ka jingpyrkhing pahara, ka la mih ka jingiania kaba jur bad ki nongialam ka KSU ha kaba hadien la khot noh ia ki shapoh police station na ka bynta ban pynlong ia ka jingiakren ia sngewthuh.
Haba kren sha ki lad pathai khubor, u Najiar u la ong ba ka KSU ka la dawa na ki pulit ba ki dei ban kiar na kaba kem ia ki dkhot jong ka seng da kaba pynshong nongrim tang lyngba u mobile tower ia ka jaka kaba ki don.
“Watla ngim lah ban tuklar ha kaba iadei bad ka jingtohkit jong ki pulit, hynrei ki pulit hi ki la iai ban ba ki la kem ia kine ki arngut ki dkhot tang halor ka jingsuba namar ka jaka kaba ki don katkum ka jingkdew ia ka jaka kaba ki don lyngba ki mobile phone jong ki ha ka por ba la jia katei ka jingjia ka jingshah pyniap,” u la ong.
U la ong ruh ba ka jingkdew ia kiba bun ki dkhot jong ka seng kan pyni beit ha katei ka jaka namar ki la wan ban iashim bynta ha ka jingpynlong ia ka jingiakhih pyrshah Citizenship Amendment Act (CAA) ba la khot pynlong da ka KSU ha Ichamati ha ka 27 tarik u Lber ba la dep.
“Ngi la don ha kane ka jaka (Ichamati) namar ka jingialang pyrshah CAA kumta ka long ka jingshisha ba lyngba u mobile tower kan pynmih kumjuh. Kumta lada ki pulit kim don ia ki sakhi kiba khlain ki dei ban kiar na kaba kem ia ki dkhot jong ngi tang lyngba ka jingkdew jong u tower. Ki pulit ki la pyntip ruh ha ngi ba ki dang ap ia ka hukum ha kaba iadei bad kane ka bynta,” ong une u nongialam ka KSU.
Nalor kata u la kam ruh ba hadien ka jingiakhih da kaba thang ia ki rule jong ka CAA, ki dkhot ka seng mardor ki la iapra bad mih noh na kane ka jaka. “Ngim don jingtip satia ha kaba iadei bad katei ka jingjia shah pyniap bad kane ka jingkynnoh ka dei ka jingthmu ban pynjah burom ia ka KSU da ki katto katne ki kynhn shim kabu namar ki tip ngi la wan hangne na ka bynta ban aijingiada ia la ka jong ka jaidbynriew,” u la bynrap.
Haba pynpaw ka jingpyrshah halor ka jingwan kem ha ka por mynmiet myniong, u Najiar u la ong, “Ngi la kren shai sha ki pulit ba lada ki kwah ban iakren ia ki dkhot jong ngi, phone ia ngi, ngi kloi ban wan bad iakynduh namar ngim don bynta bad ngim don daw ruh ban sheptieng iano iano.”
“Ngim dei satia ki lehnoh kiba hap ban rieh.Ngim don jaka ban phetrieh namar ngi dei ki seng samla pule,” u la ong da kaba maham ruh ba ka seng kam banse ban shim da ki sienjam kiba tyngeh lada ki bor pulit ki pulom ban pynurlong ia ka jingdawa.
Nalor kata une u nongialam ka seng u la ther tyngeh ia ki pulit halor ka jingkloi ban pynpaw ia ki kyrteng jong kine ki arngut ki dkhot khlem pat lap ia ka jingdonkti ka jong ki ha katei ka jingjia. Hynrei ha kaba iadei bad ka jingshah pyniap jong u dkhot ka KSU u (L) Lurshai Hynniewta ha Ichamati ha u snem 2020, ki pulit ki la buhrieh ia ki kyrteng bad aijingiada ia kiba shah kynnoh donkti.
Shuh shuh u la buh jingkylli ruh da kaba ong mano ban shim jingkitkhlieh halor kane ka jingpynthohbria lada shem ba kine ki arngut ki dkhot kim donkti ha katei ka jingjia.
Kham hashwa na ka liang ki nongialam ka KSU ki la pynpaw ruh ka jingpyrshah kaba jur halor ka jingpynpaw jinglong jong u heh pulit ha ka por ba kila leit ban pynlong ka jingiakren.
Facebook
Instagram
Youtube
Twitter
Leave a Reply