Ka jingialang paidbah ki nongtrei Muster Roll & Casual ban iakren iaka hok bai bylla sngi

Syllad | The Rising MeghalayaNovember 30, 2024

Ka All Jaiñtia Muster Roll Workers & Labour Union (AJMWLU) kala pyntip paidbah ba kan pynlong iaka jingialang paidbah jong ki nongtrei Muster Roll bad Casual Workers ha ki tnad sorkar bapher bapher na ka bynta ban iakren sani halor ka bai bylla sngi kaba kine ki nongtrei ba rit ka sorkar ki dei ban ioh katkum ka ain jong ki nongbylla sngi.

Kane ka jingialang paidbah kan long haka 2 tarik Nohprah 2024 haka por 10:30 AM ha iungwalieh ka dorbar shnong Tpep Pale, Jowai.

Katkum ka jingpynbna ka AJMWLU, kala ong, “La kyrpad jur ia phi baroh kiba trei Muster Roll/Casual wage/ dkhot ka MBOCWB Labour dept, kiba sngew trai, kiba la im na ki jingiakhun ka seng ha ki bnai ki snem ba la da dep ban im ban ioh ia ka hok jong ngi, ba phin sngewbha ba phin pyllait por khnang khnang ban wan ia shimbynta lang ha ka general meeting ka kam iap, kam im jong ngi.”

Ki mat (agenda) kiba yn iakren ki long:

• Ka jingpynslem ka Sorkar Jylla ban pynkiew ia ka bai bylla sngi (VDA) ka ba dei ban pyntreikam naduh ka 1st October, 2024.
• Ka jingbym siew ka Sorkar ia ka bai mylla sngi ka ba dei Hok ban pynkiew shi sien 5 snem (Basic Floor Rates) naduh ka 1st October 2023, Katkum ka Aiñ Minimum wage Act 1958.

“Ka jingbym patiaw ka Sorkar Jylla ban pyntrei kam ia kine kiba ngi la dei hok ban ioh, khamtam ki jingkiew dor lut ki marbam ha iew ha dukan, ka bai bording, ka bai kot bai pule ki khun ki pyrsa, bad kiwei kiwei kiba la ktah ia ki rukom im kiba man la ka sngi ka jong ngi kiba trei bylla sngi. Ngi Kyrpad ia phi baroh ba phin pyllait por khnang khnang ban ia mih paidbah, ba phin wan iakren ha kane ka jingialang kaba long ka kam iap kam im jong ngi kiba bylla sngi.” ong ki nongialam ka AJMWLU.

Ha kane ka jingialang u Ma Khroo L Pariat, founder bad adviser ka seng un sa ia don lang, ban kren bad batai bniah ia kitei ki mat.