Ka jingiakhun mynta ka dei hadpeng ka MDA bad Congress: Dr. Jemino

Syllad | The Rising MeghalayaApril 4, 2019

MOWKAIAW: U Kyrtong monlang jong ka Meghalaya Democratic Alliance (MDA) na ka UDP u Dr. Jemino Mawthoh ula ong “Kane ka dei ka sien kaba nyngkong haka history ka Meghalaya kaba ki saw tylli ki seng saiñ hima ki la iarai ban iatylli ban iakhun MP elekshon bad ka jingiakhun mynta ka long hapdeng ka sorkar MDA pyrshah ia ka party Congress.”

“U kyrtong ka Congress u Ma Vincent H Pala ha ka jinglong MP jong u kaba shiphew snem lynter  u khlem iasaid ban pyllait ia ka jingkhang tih dewiong, u khlem iakhun ban pynrung ia ka ktien Khasi ka 8th Schedule bad sahkut ki kam pynroi pynpar ha ka jylla namar ba u MP u shong sngap jar ha Parliament,” la ong u Jemino haba kren haka jingialang ha Mowkaiaw haka sngi Palei.

Ula ong ba haka jingsynshar jong ka sorkar Congress ngi iohi tang ka jingsohkyrdot suda bad kam lah ban wanrah ïaka roi ka par kumjuh ban weng iaka jingduh kam duhjam  ki khun samla kiba nang la stad.

“Ka jingiatylli ka sorkar MDA bad ka jingiatylli ki saw seng UDP, NPP, HSPDP bad PDF ka long ka jingiatylli jong ka jaidbynriew namar da kawei ka sur ka dur ngi iakhun lang ia ka elekshon MP pyrshah sha ki party ri thor’’

Ula pynkynmaw ia ki paidbah shaphang u Prof G G Swell uba la long u MP da kaba iakhun na ka party rilum ne regional party bad u la noh synniang shibun ia ka jylla haba u la jer kyrteng ia ka North Eastern Hills University (NEHU) bad dei na ka daw u Prof. Swell ba ki paidbah ki la long trai ia u dewiong ha ka por ba ka Sorkar kmie ka la mut ban shim noh sha ka.

Kiwei kiwei kiba la ai jingkren ki long u MLA ka Mowkaiaw u Bah Nujorki Sungoh, u Chairman ka JHADC u Bah Lakhon Biam, u MDC ka Mowkaiaw u Bah W G Sungoh.