Ka jaka ban tei iaka Mini Secretariat ha Jowai ka biang bha ong u Myntri Rangbah

Syllad | The Rising MeghalayaNovember 7, 2020

U Myntri Rangbah jong ka Jylla u Conrad K Sangma ula ong baka jaka ban tei iaka Mini Secretariat ha Ladthadlaboh ha jaka jong ka PWD kadei kaba biang eh.

U Myntri Rangbah ula ong ia kane haba wan jurip iaka jaka ban tei iaka mini secretariat ha Jowai ha phyllaw jong ka North Jowai Division haka sngi Saitjain. Ha kane ka jingwan jurip ia kane ka jaka ka PWD la iadonlang u MLA ka Jowai u ma Wailadmiki Shylla bad u Myntri ka tnad Pule Puthi u ma Lahkmen Rymbui, u DC West Jaintia Hills u ma Garod LSN Dykes.

“Kane ka jaka ka don hapdeng ka sor Jowai bad kan iarap shibun iaki paidbah ban ioh iaka jingshakri tang ha kawei ka iing. Kadei ka jaka ba lait liang ki surok bad yn pynbiang ruh iaki CCTV ban shngain,” la ong u Myntri Rangbah u Conrad K Sangma bad bynrap baka DC ophis ruh yn rah ha kane ka jaka namar ka ophis Dc ruh kadei kaba khapngiah bad nalor kiwei kiwei ki ophis.

“Ka rai jong ka sorkar ban shna iaka mini secretariat ha Jowai bad Tura ka dei ka project kaba kongsan bad yn sdangh noh shen khnang ban ai ka jingshakri bad ban pynjan iaki tnad sorkar sha u paidbah,” la ong u Conrad.

Haba kylli balei ba sorkar ka rai kyrkieh ban shna iaka Mini Secretariat haba ka Jowai ka duna ha baroh ki liang haka roi ka par ha baroh ki liang naduh ka umbam umdih, ka koit ka khiah, ka surok bad ka lad pule, ka jubab u Myntri Rangbah kalong ba “Ngi la pynlut ka bor ka sor bad ka pisa ban pynbiang iaki jingdonkam naduh ka um bam um dih bad ngi la pyrshang ban pyndep wat iaki projek ba sahteng. Ha kane ka sorkar khambun ka pisa ngi pyllut haka pule puthi bad nga sngew ba ngi iaid haka lynti kaba dei ban wanrah iaka jingkylla.”

“Ka sor Jowai bad Tura ki dei ki sor kiba la mang ban pynkylla kum ki Smart Town bad nyngkong yn pynbha pynmiat iaki surok shnong bad ban wanrah kiwei kiwei ki kam pynroi bad la mang haduh 10-15 klur tyngka nalor ban shna iaki jaka pyllang niut bad pynlong ia kine ki sor kiba khuid kiba suba,” ong shuh shuh u Myntri Rangbah.

Ula ong shuh shuh “Ngim lah ban wanrah jingkylla mar mar haki 1-2 snem bad ka sorkar kala pynlut bun ka pisa ban pynbiang iaki jingdonkam khamtam ha kam pule puthi naka bynta ban tei iing skul, ki kolej bad haka juh ka por ngi la pyrshang ban pyndep wat iaki projek ba sahteng da ki bun bun snem.”